جوزك على ما تعوديه.. حياتى فى المطبخ
رغدة أبورجب
منها لله فيديوهات الإنستجرام والتيك توك اللى أقنعت الرجالة إن البيتزا بتاخد ١٠ دقايق، وإن المحشى سهل، والحمام مفيش أسهل منه.
فى إيه؟ إيه اللى حصل فى الدنيا، الرجالة سقف طموحاتها طلع لفوق بزيادة، طلباتهم فى الأكل أصبحت صعبة.
يقعد بالليل بعد ما يرجع من الشغل وماسك فى إيده النسكافيه ولا كوباية الشاى وعمال يقلب فى الفيديوهات اللى على الإنستجرام ويشوف وصفات الأكل المختلفة، وطبعا ده بيترجم للست وتبتدى لستة الطلبات اللى بقت معقدة ومحتاجة تفانين فى نوعية الأكل، مش بس كده لا لازم الأكل يبقى هيلثى علشان الصحه والشرايين؟!
ما له الرز والخضار واللحمة؟ قصروا معانا فى إيه؟ قالك لازم تفننى فى نوعيات الأكل ولازم ناكل حاجة حلوة وتكون هيلثى. الست حياتها بقت فى المطبخ طول اليوم قاعدة بتطبخ علشانه وعلشان العيال، لدرجة أنهم مبقوش يحبوا ياكلوا بره البيت. طبعا دى حاجة حلوة بس فى نفس الوقت الرحمة بتبقى مطلوبة أحيانا.
ولازم هنا نشرح إن فيديوهات الإنستجرام والتيك توك دى بتوضح الخطوات بشكل سريع وإن الوصفات دى بتاخد وقت طويل جدا مش زى اللى فى الفيديو وطبعا مجهود جبار. فضرورة اختيار الوقت المناسب لاختيار عمل الوصفة مهم، وكمان مراعاة إن الست دى من لحم ودم وممكن جدا تكون تعبانة، ظهرها مثلا بيوجعها من كتر الوقفة فى المطبخ.
فمش لازم تحقق كل أمنياتك فى الأكل على حسابها، وبعدين أعتقد إنك محتاج تعمل دايت وتقلل من أكلك شوية علشان الكولسترول.
