جوزك على ما تعوديه.. كفاية تنظير
رغدة أبورجب
ده أسلوب بعض الرجال مع زوجاتهم، عينه على نقاط ضعفها، مركز مع عيوبها بشكل كبير. مش قادر يستوعب إن فى عوامل بتخلى الست توصل للمرحلة دى، وده بيكون نتيجة السن والخلفة وساعات المرض وعلى فكرة هو كمان بيكون وصل ليها بس مش بيعترف وهى مش بتحب تواجهه.
أنا متفهمة إن فى رجالة كتير مش بتحب تشوف مراتتها زايدة فى الوزن ودايمًا تحب تشوفها واخدة بالها من نفسها، وتلاقيه لو فى حاجة ممكن يقول لها تروح لدكتور تجميل علشان يظبها، لدرجة إن فى أزواج بيطلبوا من مراتتهم يلجأوا لدكاترة تجميل وتخسيس علشان ترجع زى الأول، وأحيانًا بيصمم أنها تخضع لعمليات.
طيب لو إنت مركز جدا فى التفاصيل وعاوز معاك ملكة جمال الكون مفيش مانع محدش بيكره الجمال، بس فى سؤال مهم حضرتك أخبارك إيه؟ تحب إنها تقول لك على دكتور التجميل علشان الكرش اللى واصل للركب ولا اللغد اللى بقى واخد كل وشك؟!
المجتمع بيدى الحق للراجل إنه ينظر على الست والعكس غير متاح.
لو أنت شايف إنك تستاهل ملكة الجمال يبقى هى كمان تستاهل ملك جمال.
بلاش الضغط ده، مش كل حاجة بنشوفها على التيك توك نشبط فيها، الحياة صعبة بلاش نصعبها على بعض
عيش وانبسط باللى معاك وقول الحمد لله غيرك مش لاقى، والأهم من كده إنها لو عملت العمليات دى تأكد إنها مش هتكمل معاك، اهتماماتها هتختلف ساعتها ومتلومش إلا نفسك ساعتها.
