جوزك على ما تعوديه.. حتقضى رأس السنة فين؟
رغدة أبورجب
ده سؤال المفروض مش بتاع المحترفين، ده للهواة الجدد. لأن المحترفين عارفين إجابته وحافظينها.. مع مراتى حبيبتى أما بقى الهواة الجدد اللى لسة مش عارفين مصلحتهم هما بقى اللى الدنيا لسة واخداهم ومش عارفين مصلحتهم ويقولوا بقى إحنا حنسافر نقضى رأس السنة مع أصحابنا.
نسافر ومع أصحابنا وفى رأس السنة شوف الجبروت ويقول لك الستات مفترية، ستات مين اللى مفترية؟ ده أنتم ربنا ما يحكمكم على حد.
بقى معقولة حييجى لك نفس تستقبل السنة الجديدة وأنت مش مع مراتك؟
طب إزاى؟ ده حتى ممكن تطلع سنة كبيسة يا راجل؟ ده أحلى حاجة كده لما الساعة تيجى 12 وتقول لها كل سنة وأنتى طيبة وسنة سعيدة علينا مع بعض يا حبيبتى، أينعم بيبقى أى كلام بس هى بتحاول تصدقه وكله بيزق السنة علشان السنة اللى بعدها وهكذا.
إحنا مع الحريات على فكرة وأن كل واحد من حقه فى بريك وإجازة، يفصل فيها ويروح الغردقة أو أى حتة مع أصحابه سواء الست أو الراجل.
بس فى مناسبات لازم تحتفلوا بيها سوا لأن سفر فرد من الأفراد بيخلى الطرف التانى يكون لوحده.
ومثل هذه المناسبات هى التى تصنع الذكريات..
بلاش تسافر اسمع منى أنا خايفة عليك.
