ركن مختلف
منى رضوان
ركن مختلف هى أغنية كتبها وغناها چورج مايكل فى سنة 1986.
چورج كتب الأغنية بسبب تجربة شخصية اتكلم عنها بعد كدة فى لقاء وقال إن الأغنية هى أصدق ما غنى على الإطلاق مشيراً أنها جاءت من رحم تجربة حقيقة وواعية.
وأضاف أنه مر بتجربة سريعة جداً وأنها حاجة مدهشة أن فى عاطفة قوية تتولد فى فترة قصيرة من الزمن وأن إزاى ممكن شخص عابر لم يمكث كثيراً فى حياتنا أن يهزنا حتى بعد أن يرحل وتنتهى العلاقة.
الأغنية فى أصلها بتتكلم عن الانفصال عن شخص بنحبه، سواء حبا عقلانيا أم حبا عاطفيا وفيها اتكلم چورج عن شعوره باللحظات بتاعة الانفصال وإزاى أثرت فيه جداً.
كلمات الأغنية حزينة ولكنها مؤثرة وحقيقية وفيها تقرير بأنه شعور قاس، شعور من يصل له يتمنى أنه ميكونش لا قابل الشخص ولا عاش التجربة.
فى مقطع فى الأغنية يتمنى چورج أن القدر مكانش جمعه مع هذا الشخص مدللاً على ده بأنه يا ريت كان انعطف لركن مختلف فتمضى فرصة اللقاء وكان كل واحد مشى فى وجهة ومسار مختلف وفضلوا غرباء.
تطرح الأغنية فكرة القدر الذى يجمع الناس بطرق أحيانا تبدو كالمستحيلات، وإنه إزاى بيخلى أمور تبدو خارقة الحدوث حقيقة ويجد الإنسان نفسه فى موقف لا يعلم كيف يتصرف فيه أو إزاى وصله.
الناس كتلة من المشاعر والأحاسيس، بيلبسوا الأقنعة وبيصدروا الصورة المنشودة عن نفسهم علشان تكون دى واجهتهم عند الآخرين ولكن خلف الأقنعة أمور كتير يعيشها الإنسان وقلما يراها من ينظر للصورة العامة بتاعته من برة.
لو خيروك بين أن القدر يحطك فى حتة قد تسعدك أو تزعلك سواء لو قابلت حد أو حصلك موقف يا ترى هتكون من أى فريق من دول: فريق قبول ما يفعله القدر ويخش فى التجربة ويا يكسب يا يخسر ولا الفريق الليّ يحب يفضل على البر ويضحى بالتجربة ويرجو أن القدر لا يختبره ويظل فى مأمن حتى لو القدر كان شايله شىء كويس؟
حيرة كبيرة بين إقدام وتراجع وتقديم خطوة وتأخيرها .
ناس ترى فى الخوف من الإقدام سلامة وأمانا وترضى بالفرص الضائعة وبيقبلوا ما اختاروه وناس بتاخد رسائل القدر ومتحاربوش وتمشى فى الطريق وتعرف بالتجربة هو طريق مسدود ولا مفتوح وهياخدهم لحتة أجمل.
الفرق بين الفريق الأول والتانى هو كل واحد باصص فين، الليّ باصص على الماضى وعايش فيه يقبل أن يظل كما هو، منطقة الراحة هى أكثر ما يتشبث به والليّ باصص للمستقبل بيستقبل رسائل القدر وبيشوف مغزاها، المخاطرة يا بتكسبه يا بتعلمه وهو فى الحالتين كسبان.
يختلف الناس فى طبيعة تفكيرهم ويبقى شىء واحد أن كل واحد بيحاسب على اختياراته وأن فى ناس بتختار أنها متخترش.
