جوزك على ما تعوديه.. عينك رايحة وجاية
رغدة أبورجب
الستات فعلاً مظلومين فى الموضوع ده، الراجل مركز بزيادة، طبعًا مش معاها. مركز مع أى حد تانى غيرها والتركيز ده من أول النظرة لحاجات تانية كتير أوى.
يعنى ممكن تكون الست عمَّالة تحكى موضوع مهم وهما ماشيين فى الشارع تلاقى الراجل مش مركز أساسًا مع أى حاجة هى بتقولها وعمال يبص على كل واحدة معدية فى الشارع . خير حضرتك فى حاجة معينة؟
وطبعًا بيرد عليها بمنتهى البراءة: لا أبدًا مفيش حاجة سرحت فى الشغل.
على أساس إن الشغل ده جميل وبنسرح فيه كمان وقت الخروج.
الفكرة إن احتراما للست اللى أنت معاها لازم متبصش على حد طالما هى معاك، ده طبعا أقل واجب لأن المفروض متبصش لا وهى معاك ولا وهى مش معاك.
طبعا حتقول أنا مقدرش أبص لحد غيرها ده بيكون مجرد فضول، وهنا أقول لك إن الفضول بردوا مرفوض خصوصًا لو الموضوع بيضايقها وذلك احترامًا لوجودها.
قدر النعمة اللى معاك بدل ما تزول وخليك لطيف وركز معاها وأنتم خارجين مش بالسمع بس، بكل حواسك، متبقاش عينك على كل واحدة رايحة وجاية ولابسة إيه وشكلها عامل إزاى، وده لمصلحتك لأنها لو ركزت حتعيش أحلى يوم لدرجة إنكً ممكن متنساش اليوم ده أبدًا.
