لو مش قادر تشترى حشيش.. بيعه!

بطل هذا الحوار من لحم ودم، يلعب كل الأدوار ويضع قواعد اللعبة التى ينفذها.. بنفسه، إنه الديلر الحقيقى  أو المتهم الأول فى الجرائم التى ترتكب فى الشارع المصرى بعد أن تزايدت حوادث المدنيين وسقوط الأبرياء من أبناء الوطن.

دخل عالم المخدرات وقال إنه نادم على العمل به، بعد قيام ثورة 25 يناير  وتحول من متعاطٍ إلى بائع، بعد أن فقد عمله بفعل الكساد ولم يجد عملا بديلا بمؤهله المتوسط.
الديلر - الذى طلب عدم ذكر اسمه - تحدث لنا فى لقاء مسجل بالصوت والصورة «أخفينا فيه وجهه»، عن مهنته كوسيط بين التجار الكبار والصغار والمتعاطين،  وكواليس تجارة المخدرات فى لقاء فريد من نوعه تنفرد به «روزاليوسف».
قال:
- أنا سمسار مخدرات باخد البضاعة بتاعتى من عدد من المعلمين وليس معلما محددا لأن ربع مصر معلمون يبيعون المخدرات، وأنا آخد من المعلم حتتين بـ5000 جنيه بقطعهم أرباع، الربع بيبقى عامل معايا   450 جنيها، وصوابع الصباع ببيعه بـ150 جنيها والصباع بيعمل 10 سجاير.
والنظام بيبقى بالتقسيط وأنا لو معايا 5000 جنيه أروح أبيع مخدرات ليه أنا باخد الحتتين منه بـ5000 جنيه وهو بيبقى جايبها بـ4000 مثلا باخدهم وبعد ما أوزعهم بروح أديله الفلوس بتاعته وبطلع مكسبى لوحده، ومقدرش مرجعلوش الفلوس،لأن التعامل فى شغلانتنا دى بيعتمد على الرجولة والشرف مع المعلم بتاعى.
وحول طريقة التعارف بين الديلر والزبون أضاف:
- الناس بتوصلى بطريقتين: الطريقة الأولى: مباشرة لو أنا شغال تبع «دولاب» معين بيتعرفوا عليا أول مرة بيشتروا منى، وبعد كده بيبقوا زباين عندى.
الطريقة التانية: ودى تخص الناس الراقية اللى مستواهم المادى عالى جدا بيبقى التعامل بالتليفون علشان هما مش بيحبوا يدخلوا المكان علشان سمعتهم فبياخدوا رقمى ويكلمونى وأنا بوصلهم الكمية المطلوبة من المخدرات زى «الديلفرى يعنى».
∎ كيف تستطيع التصرف فى المخدرات دون أن تصطدم بالحملات الأمنية؟
- أنا ديلر صغير وسط الكبار لأن الديلر الكبير ده بيبقى رجل أعمال كبير معاه ملايين بيشترى كميات كبيرة ويوزعها على المعلمين اللى فى السوق واحنا ناخد من المعلمين هى عاملة زى السلسلة بتبدأ من أكبر ديلر لأصغر ديلر، احنا الصغيرين بنتعامل مع الناس اللى بتشرب عشان تتكيف بس.
وشغلنا مبقاش زى زمان، تلقى الديلر واقف على الشارع وبيبيع فى السر، الموضوع بقى أسهل بكتير، كله بيتم فى التليفون وأنا مش بتعامل غير مع الناس النظيفة اللى بتقدر المزاج ومش بتفاصل وتتعبنى.
∎ ما أكثر مناطق «الديلر»؟
- أكبر تجمع بيبقى متمركز فى مناطق زى مصر القديمة، وشبرا، ودار السلام، وطرة البلد، والمعادى.
ومنطقة اسمها أبوالغيط تبع القليوبية ودى مش بس أكبر تجمع للديلر، دى منبع من منابع الحشيش، وفيها مكابس حشيش بأعداد مهولة.
وكمان منطقة الجيارة فيها زيادة على أربعة دواليب، الدولاب بيورد فى اليوم صندوقين، الصندوق فيه 12 كيسا، يعملوا زيادة على 4000 صباع، فلو هو جايب الصندوق جملة بـ 25000 جنيه يكسب عليهم 15000 جنيه.
∎ هل من السهل دخول أماكن بيع المخدرات؟
- أى شخص يقدر يدخل لمكان الدولاب عادى ويخرج لأن الدولاب ده عبارة عن مكان فاضى حواليه أكثر من عشرين رجلا ماسكين سلاح لتأمين المكان من بره فى حالة حدوث أى خطر بيصدروا إشارات إنذار لينا جوه زى ما شفتى مسلسل «الباطنية» كده بالرغم أن المسلسل ما بيوصفش ربع الحقيقة، ومن جوه زى السوق فى ناس كل واحد ماسك صنف معين عارضه وبيتاجر فيه اللى معاه حشيش، واللى معاه أفيون، واللى معاه برشام، واللى معاه بودرة، واللى عارض بانجو.
∎ ما أسعار المخدرات داخل الدولاب؟
- الدولاب مش بيفرق بين غنى وفقير، الفرق الوحيد هو التسعيرة يعنى بعشرة جنيه ممكن الشخص مثلا يتكيف حشيش!، هو الدولاب بيبقى عامل تسعيرة لكل أنواع الحشيش، المعلم الكبير بيبقى مقعد عدد من الأشخاص جنب بعض، فيه اللى بيبيع بمية جنيه وفى اللى بيبيع بخمسين، وفى اللى بيبقى مضروب وبيتباع بعشرين وعشرة جنيه، وفى اللى بيوصل لـ450 جنيها وده بيبقى بتاع الناس التقيلة أصحاب المراكز فى البلد.
وسعر كيس الحشيش من المكبس نفسه مش بيعدى الـ500 جنيه على ما بيوصل لأصغر ديلر بيبقى ثمنه 2500 وكل معلم بياخدلو من المكبس من 3 لـ 4 صناديق، كل صندوق فيه 250 كيسا ويوزع على رجالته وهو فى الآخر بيبقى كسب أكثر من ضعف الرقم اللى اشترى بيه.
∎ ما أكثر دواليب المخدرات رواجا؟
- أكثر الدولايب اللى عليها ضغط هو دولاب جامع عمرو بن العاص ده فى شارع جنب الجامع على طول مشهور جدا، والحكومة عارفاه وواقفة على أول الشارع مستنية اللى بيشترى وخارج عشان تقبض عليه، لكن لا تجرؤ تهجم على الدولاب، وهما برضه اللى بيبلغونا لو فى حملة من الداخلية علينا عشان نأمن نفسنا!
∎ ماذا عن أماكن تجمع التجار الكبار؟
- «جزيرة الدهب» فيها أكبر تجمع للتجار الكبار، أقل تاجر فيهم بيبقى معاه بضاعة «حشيش» فى الأسبوع الواحد بحوالى 200 ألف جنيه، بيوزعها وبتبقى منفصلة عن تجارته الأساسية فى المخدرات، والمنطقة دى مش أى حد يعرف يدخلها هى متأمنة كويس أوى.
∎ من أين يتم جلب الحشيش؟
- أكبر المناطق اللى بنستورد منها حشيش وبانجو مش احنا طبعا رجال الأعمال الكبار هى سيناء، ومرسى مطروح، والإسماعيلية، اللى بنسميها بلد المانجة والبانجو لأن معظم سكانها عرب، والعرب دول ممكن يدوك شوالين بانجو مقابل كيس عيش منك، وهناك المانجة بتتزرع جنب البانجو، تيجى تشترى البانجو تلاقيه ريحته مانجة، والنوع ده من البانجو اسمه «مانجاوى»، بس الأزمة بتبقى إزاى نعدى بيهم من الكمائن.
∎ ما أصناف الحشيش الأكثر انتشارا؟
- فيه أصناف كتير من الحشيش، فى نوع اسمه «كف، كف النار، كف اللوتس، بى إم، الشجرة، الهبو، الكف المنقرش، الكافيين».
وأسعارها مختلفة، أغلاها الكف المنقرش وهو أجودها، أما الكف اللوتس فيليه فى الجودة، والأسماء دى بتبقى نابعة من الأختام اللى بتبقى على الكيس، الكيس بيبقى مختوم مثلا بكف وجنبه زهرة اللوتس فبيتسمى باسمه وكلها بيتعمل فى مكبس واحد لأنها عجينة بتتعمل فى بعضها مع «الحنة»، و«الزيت»!.
∎ ما أشهر المكابس فى مصر؟
- إسكندرية هى الراعى الرسمى لمكابس الحشيش من أول الكيلو 21 لحد آخر إسكندرية، خصوصا فى منطقة «أبو تلات» هناك الحشيش يباع علنى على عينك يا تاجر والصباع اللى بنبيعه هنا بـ100 جنيه هناك رخيص بـ20 جنيها بس مع اختلاف الحشيش المغربى، عن البلدى والفرق بينهم فى الجودة طبعا المغربى بيقى ناشف وكتير، لكن البلدى بيبقى طرى وبيعمل دماغ عالية أوى!
∎ كيف وصل هذا العدد من الشباب إلى تجارة المخدرات؟
- احنا عندنا قاعدة فى الحشيش «لو مش قادر تشتريه .. بيعه» عشان كده نص الشعب بيبيع مخدرات وبيشربها برده، البداية مش صعبة الواحد بيقوى قلبه وبعدين يشوف حد يضمنه زى البنك عند المعلم علشان يسحب بضاعة «بالأجل» ويتاجر فيها، وبتبقى أى حاجة فى وش الضامن.
∎ ما أكثر الفئات العمرية شراء للمخدرات؟
- المخدرات ملهاش سن، معظم اللى بيشتروا منى، بيبقوا طلبة مدارس مش جامعات حتى، ولا بقى ليها مستوى اجتماعى بيحكمها أنا أكبر زبون عندى محاسب فى المعادى دا بييجى يشترى لو الحتة بـ100 جنيه يدينى الـ200 من غير كلام.. إنسان محترم!
∎ ما طبيعة العلاقة بين «الديلر» ورجال الأمن؟
- مفيش قسم فى مصر مايعرفش أماكن الدولايب لدرجة إن مفيش قسم فى مصر إلا وتلاقى وراه دولاب مخدرات!
المناطق اللى بيبقى قريب منها قسم زى منطقة مصر القديمة كده بيبقى فيها مرشدين والمرشد منه للأمين الاتنين دول وبعض الضباط الصغيرين بيبقوا مظبطين مع المعلمين، وبيبلغونا بأى دورية أو حملة وساعات بتيجى الحملة تحرز 5 صناديق حشيش و200 ألف جنيه مثلا وتاخدهم ومتقبضش على حد وتمشى!∎