صلاح جاهين الواد التقيل الذى لم يكمل دراسته وحطم الأرقام القياسية فى الإبداع: چاهينيات
روزاليوسف الأسبوعية
خاض الحلم بكل أوتار مشاعره، ارتقى واخترق بخياله سقوف الواقع ليتلقى الصدمة التى أسقطته.. هذه بداية نهاية صلاح جاهين، وبين البداية والنهاية كانت الجريمة التى ارتكبها فى حق نفسه وحق من أحبوه وانتظروه ولقبوه بفيلسوف البسطاء.حب جاهين لحلم ناصر، وتعلقه بالحلم بشكل لا يتحمل وزن عواطفه جعل صدمته بالواقع أقوى بكثير من صدمة اكتشاف خيانة الحبيب لحبيبه.. وربما لهذا السبب قرر شاعر الثورة أن يوقف قطار حياته بفرامل بطيئة عطلت مصانع الحلم وأربكت القلب الحزين.
ليه يا حبيبـتى ما بينا دايمـاً سفر؟
ده البعد ذنـب كبـير لا يغـتفر
ليه يا حبيبتـى ما بينا دايماً بحـور؟
أعدى بحر ألاقى غيره اتحفر
دى مـذكرات وكـتـبتهـا من سـنين
فى نـوتـه زرقـا لون بحـور الحنـين
عترت فيها.. رميتها فى المهمـلات
وقلت أمـا صـحيح كلام مـخبولـين
السيمفونية اسمها الثورة على المحتل
سنة تسعتاشر اتعزفت فى كل محل
تأليف محمد فريد ألفها من سنوات
وكتب لها النوتة بوق وبيانو وكمنجات
عزفوها من غير قيادته وجمعهم ما اختل
غير وقت صرف الأجور لما النفر ينذل
من وقتها وغلوشت نغمات على نغمات
وسعد زغلول زعيم مشغول فى الانتخابات
يخطب ويضرب بإيده يطبع البصمات
على اسم مصر
قالوا السياسة مهلكة بشكل عام
وبحورها يا بنى خشنة مش ريش نعام
غوص فيها تلقى الغرقانين كلهـم
شايلين غنايم .. والخفيف اللى عام
البلياتشو أكبر دليل على إن الوش المبتسم، مش دايما بيكون وراه إنسان مبسوط، ودى فعلا كانت حالتك يا عم صلاح. إنت جالك اكتئاب بعد النكسة، قلت قبل كده إنها حالة كاملة بتنتابك، وبتهاجمك فى أوقات معينة. اتغلب عليك شعور بإنك كنت بتساهم فى خداع الناس العاديين. سافرت فعلا لإحدى المصحات النفسية فى موسكو وقضيت فيها خمسة أشهر، إلا أنك عدت باكتئاب مضاعف.. ازاى بتشوف الحزن؟
يا حزين يا قمقم تحت بحر الضياع
حزين أنا زيك وإيه مستطاع
الحزن ما بقالهوش جلال يا جدع
الحزن زى البرد.. زى الصداع
الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
إيه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس..
إيه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الإصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس..
