زكى قدرة
منى رضوان
الجزار مهنة ظهرت فى السينما المصرية وبقت علامة لبعض النجوم اللي لا يمكن ننساهم.
حلاوة العنتبلى فى فيلم على «باب الوزير» جسده صلاح نظمى وكان من الأدوار اللي لا يمكن ننساها له ويفضل مشهده مع عادل إمام لما راح يخطب بنته ماستر سين لما قاله:
- إنت سمعت عن حلاوة العنتبلى؟! فرد كمال وقال له:
- لأ مسمعتش عنه أصلى لا مؤاخذة مبقعدش على قهوة
فرد عليه حلاوة العنتبلى وقال له الجملة التاريخية الشهيرة فى الفيلم:
- طيب يا أخويا أحب أعرفك بقى بحلاوة بيه العنتبلى، إحنا ولا فخر مليونجى، عم الجزارين، ملك اللحمة.. عارف هى إيه اللحمة؟
ممثل تانى قدم دور الجزاز المفترى الباطش وهو عدلى كاسب فى دور عباس الجزار فى فيلم «السفيرة عزيزة».
فى الفيلم ده بنشوف البطل أحمد اللي بيشتغل مدرس وبيسكن فى العمارة بتاعة عباس.
شخصية عباس كلها جشع ولسانه طويل وفج ولما أحمد بيسكن فى شقته بيقابل أخته عزيزة وبيحبها وهى بتبادله الحب وبعد ما بيتجوزوا بتلح عزيزة على جوزها أنه يقف قدام أخوها ويطالب عباس بنصيبها من الميراث ودى بتكون بداية الخلافات بينهم.
كان لعباس جملة مشهورة: «أنا جزار مواشى وجزار بنى آدمين».
فريد شوقى ملك الترسو كان هو عاشور فى فيلم «الزوج العازب» وكان بيقوم بدور تاجر اللحوم والكباش، كان عاشور مقارنة بالشكل العام الذى أظهرته السينما لمهنة الجزار وكان راجل طيب بس مزواج وحب فى الآخر المعلمة «أزهار» ودى كانت أرملة أحد الجزارين.
وفى نفس الفيلم قدم محمود المليجى شخصية الجزار من خلال «المعلم سيد الحمش» وده هو كمان كان عايز يتجوز من المعلمة أزهار اللي قامت بدورها هند رستم بس هى بتختار عاشور وتفضله عليه.
أما فيلم «المدبح» فده كان فيه صلاح قابيل كبير الجزارين وكانت فيه جزارة سيدة هى أفكار اللي قامت بدورها نادية الجندى.
ونتذكر كمان واحد قام بدور جزار لطيف جداً هو المعلم طربقها الجزار فى مسرحية المتزوجين وده كان الفنان زكريا موافى.
أما أفضل من قام بدور الجزار فى رأيى فهو «زكى قدرة» اللي قام بدوره الفنان الرائع عادل أدهم اللي قدم الجزار بشكل متميز فى فيلم «حكمتك يا رب» من خلال شخصية «زكى قدرة» وكان دمه خفيف وسكر وترك علامة كبيرة فى أذهان وذاكرة الناس مع جملته المشهورة «ادبح يا زكى قدرة.. يدبح زكى قدرة.. اسلخ يا زكى قدرة يسلخ زكى قدرة».
الجملة قالها فى سياق أنه مغلوب على أمره وبينفذ الأوامر فقط.
وكان زكى قدرة صبى المعلمة أم نعيمة اللي قامت فيها القديرة سناء جميل بدور المعلمة.
زى ما أنتم شايفين الجزار خد مكانة فى الدراما المصرية ومنها أدوار لا يمكن ننساها.. زى زكى قدرة!
