الدكتور خشبة
منى رضوان
أخذ الطبيب النفسى فى السينما عمومًا والسينما المصرية خصوصًا أنماطًا عديدة بجملته المشهورة : اتفضل على الشيزلونج واحكيلى ودى أيقونة من أيقونات أو الإيفيهات الليّ كانت ومازالت بنكررها فى يومنا.
أخذ الطبيب النفسى عدة أشكال، منهم ناس مرحة ومنهم ناس معقدة ومنهم ناس استغلت مرضاها !. أظرفهم على الإطلاق هو الدكتور خشبة الليّ جسده عبدالمنعم مدبولى فى فيلم مطاردة غرامية مع فؤاد المهندس وشويكار، محدش فينا ناسى لما كان بيعالج واحد قصير القامة وقاله يردد جملته المسخرة : «أنا مش قصير أوزعة أنا طويل وأهبل».
فى نفس الفيلم قال مدبولى جملته المشهورة «دكتور مين، ده إنت اللى دكتور يا دكتور».
أما محمود المليجى فده قدم دور الطبيب النفسى المخضرم فى الفيلم الشهير للسندريلا سعاد حسنى «بئر الحرمان»، وفيه كانت بطلة الفيلم عندها مرض ازدواج الشخصية (شيزوفرينيا) وده مرض نفسى يعانى المصاب به أنه بيبقى له شخصيتين متناقضتين، كل واحدة فيهم متعرفش حاجة عن التانية. كانت ناهد الصبح هى ميرڤت بالليل بس من غير ما تعرف - وساعدها الدكتور النفسى طلعت فى العلاج ومعرفة الليّ عندها.
دور تانى لمحمود المليجى كطبيب نفسى كان فى فيلم «المنزل 13» وفيه استغل الطبيب مريضه لارتكاب جريمة وهو منوم مغناطيسيًا، الدكتور النفسى فى الفيلم ده كان محورى وكان الدكتور هو أول من خذل مريضه باستغلاله.
رشدى أباظة قدم دور الدكتور النفسانى فى «أين عقلى» لما كانت المريضة الليّ بتروحله ضحية زوجها المريض النفسى أصلًا وكان دوره محللًا ومحققًا لحالة المريضة ومشى وراء الخيوط إلى أن وصل للأصل فى معاناة مريضته.
فاروق الفيشاوى كان طبيبًا نفسيًا لنبيلة عبيد فى «أرجوك أعطنى هذا الدواء» وهى كانت بتتعالج بسبب خيانة جوزها المتكررة لها، الرواية والفيلم قصة لإحسان عبدالقدوس حيث نرى وضعا كلاسيكيا حيث تقع المريضة فى حب دكتورها.
«خلى بالك من عقلك» ظهر فيه عادل إمام طبيبًا للجميلة شيريهان والليّ تم إيداعها فى المستشفى ظلمًا والسبب جوز أمها.
خالد الصاوى هو سليمان الحلبى فى «كدة رضا» وفيه شفنا نموذج مشابه للمنزل 13 فيها الدكتور بيستغل المريض وفى كده رضا كان ده متمثل فى استغال البرنس وسمسم وبيبو فى التحايل على الناس بسبب جعلهم شخصية واحدة.
كريم عبدالعزيز أو يحيى راشد كان الطبيب النفسى فى «الفيل الأزرق» وهو دكتور نفسى وقف شغل بسبب مشاكله هو النفسية وبعدها عاد لمزوالة المهنة مع المرضى فى مستشفى العباسية.
لا يمكن بعد سرد كل الأطباء النفسيين السابقين ننسى فؤاد خليل الليّ مثل دور الدكتور النفسانى فى أعمال كتير بشكل كوميدى.
مهنة الطبيب النفسى أخدت مساحة فى كتير من الأعمال الدرامية ومع ذلك أعتقد أنها شخصية مازالت تحوى فى جعبتها الكثير.
