جوزك على ما تعوديه.. أنا مش استرونج ولا إندبندنت ولا نيلة

إحنا مش عاوزين نبقى استرونج إندبندت ولا حاجة من الكلام الكبير ده، الست محتاجة يكون ليها رأى وليها شغل ومسئولة من راجل بياخد باله منها ومن البيت والولاد، راجل بما تحمله الكلمة من معنى.

لما تحس إنها تعبانة تقول له عادى من غير ما تحمل هم الكلمتين اللى حاتسمعهم منه لما تحكى له، من عينه انتى اللى عاوزه، انتى اللى اختارتى، مصاريفك الكتير هى اللى عاملة كده والكلام الكبير ده، ولما تحس إنها عاوزة تعيط تعيط عادى من غير ما تحسبها.

باختصار الست عاوزة تكون على طبيعتها مع جوزها ومن غير ما تحاول تثبت له إنها أحسن أو إنها أشطر، الست محتاجة لراجل تتسند عليه من غير ما تبرر له هى ليه بتتسند عليه.

أنا مش بتكلم هنا عن الظروف المادية وإنه هو اللى مسئول عن كل المستلزمات الخاصة بالأسرة، الحياة صعبة ومحتاجة مشاركة وأنا موافقة جدا على مبدأ المشاركة بين الزوجين، الفكرة إن الرجالة مبقوش بياخدوا بالهم من زوجاتهم. ولا من تفاصيلهم الصغيرة وده بينعكس بشدة على العلاقة. 

علشان العلاقات تنجح لازم كل واحد يكون فاهم كويس دوره فى العلاقة إيه، ومسئولياته ايه؟ باختصار شغلتك على المدفع إيه؟

الشعارات الجديدة دى ودت أجيال فى داهية، الشعارات دى مش مقصود بيها إن الست هى اللى تكون مسئولة عن البيت والولاد والمصاريف وإلا تبقى ست مش متحملة مسئولية. الموضوع مش كده خالص الست لازم تشعر إن فى زوج مسئول عنها وعن طلباتها وإنه دايما موجود وقت احتياجها إليه.

مش شطارة إن الست تبقى بميت راجل، الست لازم تكون ست بمواصفاتها بطبيعتها والراجل لازم يكون راجل ومسئول عن بيته، تغير الشعارات والمفاهيم بيلخبط الدنيا وبيطلع جوازت فاشلة.