جوزك على ما تعوديه..المشاركة حلوة مافيش كلام

بدون شعارات أنا متفهمة جدا ثقافتنا وبحترمها وبقدرها لكن فى استثناءات فى الحياة.

بمعنى إنه المتعارف عليه والدارج فى ثقافتنا أن الزوجة هى المسئول الأول والأخير عن جميع متطلبات المنزل وأن الزوج ربنا يعينه هو المنوط به التكفل بمصاريف هذا المنزل، وهى دى المعادلة اللى ماشيين بيها وراضيين، بس ظروف الحياه أدت إلى نزول كثير من النساء إلى حقل المعركة، قصدى الشغل، بس ده مشالش من عليها واجبتها فى المنزل، وبرضو متعايشين وعارفين نظبط.

لكن ده مش معناه نهائى إن حضرتك visitor فى البيت ومتعرفش أماكن الحاجات. مش للدرجة دى، افرض إنه حصل لا قدر الله ظرف.

طب افرض إن الست دى تعبت أو جالها كورونا مثلا! اعرف إزاى تقدر تقدم لها أكل وشرب.

يوم مثلا حبت إنها تاخد أجازة من أعمال المنزل، بلاش أجازة علشان الموضوع ده بيعمل مشاكل، اتأخرت فى الشغل لظروف خارجة عن إرادتها، تعرف نظبط الأكل اللى هى بتكون عملاه من بليل ليك إنت والأولاد. 

قصدى إن المشاركة مهمة وقرار الزواج ده مش بيكون قرار فردى ده بيكون قرار الزوجين مع بعض، فالحياة بتحتاج مشاركة فى كل التفاصيل الصغيرة قبل الكبيرة. 

ساعدوا بعض وخففوا على بعض الحياة مش ناقصة ضغوطات، مفيهاش حاجة لما تلم الغسيل مش حيحصل حاجة.