رمضان فى مصر حاجة تانية (4)
منى رضوان
مع كل رمضان يدخل ستات البيوت والمهتمون بأصل تسمية الأكلات فى الجدال البيزنطى بتاع هل هى: سنبوسك ولّا سمبوسة ولّا سمبوسك؟ ويبدأ هذا الحديث السنوى عن أشهَر المقبلات على سفرة رمضان فى الوطن العربى.. السنبوسك.
بالبحث عن أصل التسمية ومعناها تقول المراجع إن الكلمة من أصل فارسى وهى سَنبوسَك، ودى معناها المثلث، وده لأنه فى الآخر بتتعمل من العجين اللى بنطبّقها على شكل مثلث وبيتحشى جبنة، لحمة أو بطاطس وخضار.
مع مرور الوقت وانتقال أنواع الطعام من بلاد فارس للعرب قلبوا النون ميم، وده لأن اللسان العربى بيقلب النون الساكنة ميم لو جه وراها حرف الباء، زى ما الناس بتقول جمب وليس جنب مثلاً.
إيه هو أصل السنبوسك؟
تتضارب الحكايات عن أصلها وبداية ظهورها وتاريخها وموطنها الأصلى - تشير المصادر عن أصلها أنها بدأت مع الأتراك فى العصر العثمانى وفى مصادر تانية بتقول إنها من اليمن وتحديدًا حضرموت، أمّا أشهَر الرويات وأدقها فهى أن أصلها من الهند اللى مشهورة بالمقليات المغمورة بالزيت وكتبت فى أسفار الهند التاريخية وكانت بتتعمل للضيوف رفيعى الشأن والنبلاء.
من الهند انتقلت لليمن مع الاستعمار البريطانى للهند واليمن وبعدها وصلت إلى الخليج العربى مع التجار وإلى حجاج بيت الله الحرام فى السعودية ومن دول الخليج انتشرت بين سكان الدول المجاورة.
حشوات السنبوسك كتيرة، ومنها ما هو كلاسيكى ومنها ما هو كله تقاليع جديدة.
أشهَرها من الكلاسيكى اللى بالجبنة واللحمة والبطاطس والبسلة، والأخيرة دى هى السنبوسك الهندية بالضبط وهى تعد وجبة نباتية مناسبة لمعظم الشعب الهندى الهندوسى الديانة اللى كتير منهم نباتيين. وطبعًا من الحشوات الكلاسكية المشهورة اللحمة المفرومة أو الجبنة اللى ممكن تكون بيضاء بالنعناع أو سادة أو أى من الجبن الصفراء المطبوخة، ومنها اللى بتتحشى فراخ ودى مش منتشرة أوى.
التقاليع مسابتش السنبوسك فى حالها وبقى فى منها الحلو وليس الأنواع الحادقة بس زى اللى بالمسكرات المحمصة المخلوطة بالعسل، وتتحشى وتتقلى فى الزيت ولما تبرد تتغطس فى شوكولاتة ويترش عليها مكسرات مجروشة.
مشكلتى مع السنبوسك إنها تعتبر نقنقة وبالتالى الواحد ممكن ياكل منها عدد معتبرها مقبلات وفرشة للأكل اللى لسّة هياكله مع إنها فيها السعرات الحرارية مش قليلة، مثلاً واحدة بالجبنة فيها 95 سعر واللى باللحمة فيها 120 سعر تقريبًا.
يعنى علشان تحرق واحد سنبوسك محتاج حوالى ربع ساعة تمارين رياضية، فلما تضربلك 6 أو 7 غير الأكل إنت كده محتاج تاخد طريق مصر- إسكندرية الصحراوى جرى.
رمضان مرتبط بحاجات كتير على سفرته تأتى السنبوسك على رأسها وسواء قلناها بالنون أو بالميم أو كلناها بجبنة أو لحمة أو بطاطس.. نفضل نقول رمضان فى مصر حاجة تانية والسّر فى التفاصيل.
