جوزك على ما تعوديه.. الأم مش مدرسة
رغدة أبورجب
التعليم ليس حكرًا على الأم، بمعنى أدق هى ليست الوسيلة الوحيدة لتلقيهم العلم، بمعنى مباشر الأب مسئول مع الأم فى متابعة الأولاد تعليميًا.
فى فكر سائد فى المجتمع أن الأم هى اللى المفروض تذاكر وتراجع وتعمل كل حاجة تخص التعليم، والعجيب كمان فى الأمر إن الراجل بينزعج جدًا من فترات المذاكرة، ومن كتر الانزعاج يا حبيبى يقرر ينزل يرفّه على نفسه ويخرج مع أصحابه لأنه مش قادر يقعد فى التوتر الموجود فى البيت.. يا سلام!
التوتر ده مش هو السبب فيه ولا كانت تسعى له فى يوم من الأيام، هى حبيبتى كانت فكرة إن الحياة أسهل من كده وإن الأطفال بيرجعوا من المدرسة مش محتاجين حاجة زى الأفلام الأجنبى كده، إلا أنها صحيت على كابوس فظيع، وهى بتذاكر دراسات.
المجتمع بيتعامل وكأن اختصاص المذاكرة اتكتب فى القائمة باسم الزوجة، على فكرة هو ممكن يكون أشطر منها تعليميًا وعنده القدرة على توصيل المعلومة بشكل بسيط وأهم من ده كله ممكن يكون عنده طولة بال أكتر.
ولو كل ده مش موجود أبسط حاجة ممكن مشاركة حتى ولو فى فترات الامتحانات.
