إيهاب البدوى
ابن البدوى وابن إياس: فى أحوال القاهرة والناس .. فى الشدة المستنصرية ابن إياس طلب عشرة كيلو كفتة وقرص جبنة رومى وصينية مسخسخة "الحلقة 4"
صحيت الصبح على رسالة من ابن إياس يطلب قالب جبنة رومى وعيش كتير ولحمة ورز وسمنة وسكر وزيت و12 كيلو كفتة بلدى..
أنا الصراحة مكنتش فاهم كل ده ليه دى الحاجات دى عندهم أورجانيك بخيرها.
عشان مزعلوش نزلت اشتريت الحاجة.
بعدها بربع ساعة بعت رسالة تانى وقاللى تشوف قهوة بره سور القاهرة تقعد فيها قبل ما تجيلى بلاش قهوة حارة برجوان.
أنا مفهمتش بس نفذت وع الساعة 12 ركبت توك توك وصلنى القهوة اللى جنب زيزو فى الحسينية وع الساعة 12 تحول الزمن.
لقيت نفسى قدام باب بيت ابن إياس خبطت على الباب وسمعت ورايا صوت ناس بتقول رائحة طعام وجايين جرى ناحيتى.
ابن إياس فتح الباب وشدنى جوه وقاللى فين الكفتة بسرعة.
فتحت اللفة راح واخد عشر صوابع رماهم من الشباك لقيت أربع رجالة بيقطعوا بعض ع الكفتة المرمية على الأرض.
بصيت لابن إياس لقيته بياكل زى المفاجيع ب إيديه الاتنين.
وزور وشاور على القلة وهو بيتخنق اديتهاله لقيته رفعها على بقه وشرب وبعدين اتكرع فى وشى.
قلت له الله يقرفك ياجدع إيه مفيش سنس.
لا مؤاخذة يا ابن البدوى يا أخويا كنت هموت من الجوع.
شكلك باين يا صاحبى ده أنت حتى خاسس وكرشك نزل أنت عملت دايت.
دايت مين يا معلم إحنا فى الشدة المستنصرية.
يا نهارك أسود يا ابن إياس وإيه اللى رجعك الزمن ده وجبتنى معاك ليه.
كنت عايز أخده جوز أقلام بس احتراما لسنه مسكت نفسى.
رد ابن إياس عايز اكتب التاريخ بتجرد أشوف الحاجة قدام عينى.
وشوفت إيه لا مؤاخذة.
اقعد يا ابن البدوى هحكيلك مجبتش حاجة حلوة معاك.
عندك نص مدلعة ونص مسخسخة ونص مفرهدة ونص مبرشمة.
إيه دول يا ابن البدوى.. جوارى.
جوارى مين دى كنافة على رز بلبن على بسبوسة غالبًا.
ابن إياس عض نص صينية المدلعة ولحس صوابعه وقاللى عارف الهم اللى مصر فيه ده من إيه.
قلت له قول ياعم الفتاى.
الحاجة رصد.
مين الحاجة رصد.
دى أم الخليفة المستنصر بالله هى سبب البلاوى دى كلها.
إشمعنى يا غالى.
رصد كانت جارية حبشية والخليفة الظاهر لإعزاز دين الله أبو الخليفة المستنصر حبها واتجوزها.
قلت له دى نفسه حلوة أوى ياعم ابن إياس.
قالى لأ يا معلم رصد كانت صاروخ.. المهم أنه اتجوزها وخلف منها المستنصر ومات والواد عنده تمنتاشر سنة.
الست بقى كانت بتحكم وتتحكم وجابت كل العبيد وقربتهم وأعطتهم مناصب على حساب الأمراء الأتراك اللى كانوا بيحكموا.
طبعا الأمراء الأتراك اتخانقوا مع الأمراء الأحباش وبقت فوضى.
يعنى إيه لا مؤاخذة.
يعنى اتخانقوا مع بعض وقطعوا الطريق وسرقوا الناس وأهملوا الزراعة وسابو الترع من غير تطهير لغاية ما الزرع خرب وفى الوقت ده الفيضان قعد ٧ سنين ما بيجيش مصر.
وتقريبًا الناس كلت الحمير والأحصنة والقطط والكلاب كمان.
أنا سمعت يا ابن إياس ياخويا أن الناس كلت الجثث وكانوا بيخطفوا بعض وياكلوا لحوم البشر.
دى أڤورة يا ابن البدوى.
أڤورة مين يا عم الحاج ده أنت اللى كاتبه ب إيدك فى يومياتك.
لقيته بيضحك ضحكة خبيثة.
قلت له بطل ضحكاتك الصفرا دى ورد عليا مش أنت كتبت أن المصريين كانوا بيرموا خطاطيف من جوه البيوت يصطادوا بيها الناس إللى ماشية فى الشارع وياكلوهم.
يا ابن البدوى بصراحة أنا قرفان من الجماعة الفاطمين دول عشان شيعة.
يا نهارك أسود يا ابن إياس يعنى عشان الفاطميين شيعة طلعت المصريين بياكلوا الجثث ولحوم البشر.
ما أنا رجعت أكفر عن ذنبى يا ابن البدوى وبكتب التاريخ من جوه الملعب.
أنت هتعملى فيها شيكابالا يا معلم.. عمومًا لو كان المصريين بياكلوا لحوم البشر كان زمان بكرشك ده سديت جوع عشين نفر.
قوللى أنت جايبنى فى العصر الأغبر ده ليه.
هنروح بكرة نشوف مولانا السلطان المستنصر بالله لأن أمه عاملة اجتماع بكرة.
قلت لابن إياس هطلع أريح جتتى فوق ما تنادى على جارية من بتوعك توصلنى.
لقيته بيقول مكانش يتعز يامعلم بعتهم كلهم وراح فارد إيده وقاللى هات إيدك.
وشبكة العشرة دول ما معايا إلا 3 دراهم لآخر الشهر.
الصراحة صعب عليا قمت داسس متناية عشينات فى جيبه وطلعت أنام.
الصبح كنا فى مجلس الحاجة رصد وقاعد جنبها واد عنده يجى 35 سنة وهى بتقوله.
أنا مش قادرة على العيشة دى يا ابنى أنا هروح بغداد على الأقل نلاقى التلت طاقات بسهولة.
لقيت الخليفة المستنصر بيدبدب برجليه وبيقول ماتسيبنيش يا مامى.
أنا زعلان يا مامى.
أنا هعيط يامامى.
زغدت ابن إياس وقلت له إيه العيل النى ده ما تخليه يسترجل عيب كده.
قاللى بصوت واطى طول عمره ابن أمه.
الست خدت شنطة بلاستيك فيها غيارين وخماشر رغيف وحتتين جبنة قريش وفحلين بصل وطلعت خدت الجمل وشرخت على بغداد.
الخليفة المستنصر سخسخ وأغمى عليه لفينا القصر على فحل بصل عشان نفوقه اكتشفنا أن الحاجة رصد أخدت آخر فحلين بصل فى القصر وتقريبا فى مصر كلها.
مكناش عارفين نفوق المستنصر قلت ل ابن إياس اتصرف الراجل هيروح مننا.
ابن إياس رزعه كف الراجل قام وقف.
ولقيته بيعيط وهو بيقول هعمل إيه من غير ماما.
قلت له ولا يهمك يا مولانا المستنصر.
ماما زمانها جاية.
لقيت ابن اياس بيرد ورايا هو والحاضرين زى الكورس.
جاية بعد شوية جايبة لعب وحاجات.
جايبة معاها شنطة فيها وزة وبطة وبتقول واك واك.
أنا استغربت وسألت ابن إياس الناس دى حافظة الأغنية إزاى.
قاللى ده النشيد الوطنى للدولة.
المهم أنا قولت للمستنصر يا مولانا أنا سامع أن فيه واد كفاءة فى الشام اسمه بدر الجمالى.
رد المستنصر وقال أيوه فعلا ده شغال معايا.
قلت له ما تجيبه هنا يساعدك أحسن أنت اللى حواليك أمراء أحباش أو امراء أتراك ودول بيقطعوا فى بعض وأنت محتاج حد يجيى من براهم يضبطهما لمستنصر قاللى ونعم الرأى يا ابن البدوى سأعمل به وخدنى على جنب وقاللى إن شاء الله الدنيا لما تضبط هبقى أحليلك بقك ع الفكرة دى.
بس أخوك الدنيا مش ضابطة معاه هات إيدك وشبكة العشرة دول مافيش فى جيبى غير 100 درهم.
بصيت لابن إياس لقيته بيضحك قلت فى نفسى يا ابن الجنية أنت علمت المستنصر الشحاتة.
طلعت متناية واديتهاله.
قاللى اللهى ما يرميك فى ضيق قادر يا كريم.
على آخر الشهر كان بدر الجمالى بيدخل القاهرة بالعساكر بتاعته وبدأ يقبض على الأمراء الأتراك والأحباش واللى بيعترض بيقتله واللى بيقطع الطريق بيقتله.
الناس سمعت باللى بيحصل اتلمت ومبقاش فيه قطع طرق وبقى فيه أمان.
ونزل بدر الجمالى الناس تطهر الترع والمصارف وشال الضرايب من على الفلاحين.
ومن حظه الحلو الفيضان رجع تانى والزرع كتر والخير بقى كتير.
واستتب الأمر، ورجعت مصر المحروسة تانى لدرجة أن ابن إياس اشترى أربع جوارى مرة واحدة.
ولقيت الخليفة المستنصر بيناديلى.
رحت له القصر أنا وابن إياس لقيته مطلع صرة دنانير دهب وبيرميها فى حجرى ومعاها أرمينية شبه الفنانة نيللى فى عزها.
وقاللى عشان الميتناية بتاع أيام الشدة المستنصرية لما نشوف التاريخ هيكتب عنى إيه.
قلت له وأنا ببص لابن إياس أنا خايف يا مولانا يقولك الناس كانت بتاكل الجثث وبتاكل لحوم البشر من الجوع.
قاللى مش معقول هيبقى فيه أڤورة بالشكل ده يا ابن البدوى.
قلت له أنا أعرف مؤرخين ضلالية ولسه هكمل.
لقيت ابن إياس بيوطى على أيدى يبوسها وقاللى ارحم أمى عايز أخرج سليم.
قلت لمولانا السلطان عندك حق مين الضلالى اللى ممكن يكتب كده عن المصريين.
