الأحد 22 مايو 2022
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

أنا مش طنط

حقيقة: «أنا مش طنط» وآخر حد ينفع يتقاله طنط واللى بيطنطتنى مش عارف تركيبة شخصيتى ولا حاسس بمدى الجرح اللى بيسببهولى وقبل كل شىء هو حافظ مش فاهم.



معلومة هامة: طنط دى مش لقب ولا كلمة تعظيم أو احترام، «طنط» أسلوب حياة أو تشبيه زى ما تقول فلانة جدعة أو لطيفة ممكن نقول فلانة «طنط».

إذن فى رأيى (اللى ممكن تتفقوا معاه أو تختلفوا) طنط بتوصّف الشخصية مش الشخص، ولذا يا أخونّا أنا والله مش طنط.

فى مجتمعنا لقب طنط مقرون بالسن وعلشان كدة أى حد بيقول للست اللى أكبر منه يا طنط.

متشكرين أوى، بس بالنسبة ليّا لو حد عايز يحترمنى ويبجلنى ممكن يقولّى حضرتك أو يا هانم مش ترزعنى كل شوية طنط فى وشّى.

مما سبق: أى أم بعيال أو ست من غير عيال أو أى واحدة عندها شعر أبيض أو تجاعيد أو أكبر منك بكتير هى عادى ممكن تكون مش طنط.

أمثلة لمن هن لسْن طنطات:

- أى واحدة روحها مرحة ومقبلة على الحياة وفاردة وشّها... مش طنط.

- أى ست مش عايشة فى الكومفورت زون ومش راضية بقليلها.. مش طنط.

- أى ست بتخاطر وبتاخد قرارات محسوبة أو غير محسوبة ساعات.. مش طنط.

- أى ست بتحاول تملى دنيتها ودنيا من حولها بالمرح وخفة الظل والمغامرات...مش طنط.

- أى ست متحملة للمسئولية وبتقوم بدورها وهى مش متمسكنة ولا عايشة دور الضحية.. مش طنط.

يا جدعان مش علشان شوية شعر أبيض وكرمشتين فى الوش ولّا عيال كبيرة وطويلة وسن فى البطاقة نبقى طنطات.

ويا ريتها بتقف عند كدة ده ساعات ممكن يبقى حد بينا وبينه خمس ولا ست سنين وشكله يخلفنا ويقولنا طنط - سلامة الشوف يا حبيبى.

واللى بيزودها ويخليها خل إنك لو محجبة واتجوزتى وخلفتى فتاخدى لقب مُرَكب هو طنط الحاجة - نازل پاكدج مع الأمومة ده ولا إيه؟

نهايته- محدش يحط الناس فى قوالب ويوزع ألقاب تظلمهم، أو أضعف الإيمان لا تمثلهم.

خلينا نركز فى الشخصية وعلى أساسها نشوف نقول طنط ولّا لأ- الشخصية هى المقياس الحقيقى اللى لازم ناخده فى الاعتبار.

ومن موقعى هذا أنا بطالب الناس يعيدوا النظر فى كل الطنطات اللى حواليهم ويصنفوهم صح - ويا ريت ميصنفهومش أصلاً وده يكون أحسن.

المهم متجرحوناش وتسمونا طنط علشان تبقوا انتوا النُغة الصغننين واحنا الطنطات العواجيز.

إلى كل الستات اللى شايفين نفسهم مش طنط، اللى يقولِك طنط تقوليله كلمتين: طنط فى عينك!

استعملوا أسامينا الله يكرمكم بلا ألقاب قبلها.

ملاحظة: نفس الكلام اللى فوق ده ينطبق على الرجالة اللى بيتقالهم عمّو أو أنكل وهم لا ده ولا ده.