جوزك على ما تعوديه..بتفطرى جوزك إيه الصبح قبل الشغل

السؤال ده يشمل جميع أيام الأسبوع مش الجمعه بس، أصل قرار أن الواحد يقوم الصبح بدرى فى عز البرد ده علشان يحضر فطار أشبه بقرار الاستحمام بالليل القراران ميفرقوش عن بعضهما فالاثنان قرارات انتحارية.

طبعا أول الجواز تلاقى الزوجة عمالة تفنن وتبتكر فى الفطار،وممكن تلاقيها كمان مظبطة السفرة وحاطه ورد وحركات ومزيكا. وبعد شوية يتغير الحال ويبقى سندويتش جبنه أو فول مع كوباية قهوة أو شاى. وطبعا دوام الحال من المحال وتندثر هذه العادة من الحياة الزوجية. 

اللى هى أصلا عادة غربية جديدة على مجتمعنا، فطار إيه اللى على الصبح فى البرد ده، مش كفاية وجبة الغدا يبوس إيده وش وضهر. ده فى جوازات بتبوظ على فطار الصبح ده.

أنا طبعا بهرج يا جماعة لو جوزك بيحب يفطر قبل الشغل لازم تحضرى له،مش لازم تقومى وتشغلى مزيكا وورد وجو حلو البدايات ده،ممكن تحضريه من بالليل وهو يسخنه مثلا،أو تحضرى له أكل يأخده معاه الشغل.

طبعا ناس حتقول لى ازاى تحضر الفطار من قبلها وليه متصحاش معاه حقول لأن الست الغلبانة دى تقريبا مش بتنام.

علشان مليون سبب ليه علاقة بالعيال والبيت والشغل مش لازم كل شوية أفكركم بهذه الأسباب.

وعادى يعنى هو راجل كبير وراشد ويعرف يسخن أكله مش حيعمل تسريب فى الغاز ولا حيولع فى المنطقة.

عادى يا جماعة الجوازة مش حتقف على الفطار لسه فى غدا وعشا، وبعدين إحنا لازم كلنا نعمل دايت بعد الأكل الرهيب اللى بناكله في الجو ده.