أزمة عالمية فى أسعار الأغذية والطاقة والمصريون ع السوشيال ميديا يناقشون: نظرية كرتونة البيض!

اللى متابع السوشيال ميديا هيقرأ بلغتها «بوست التحفيل» على سعر كرتونة البيض اللى تعدّى سعرها «خمسين جنيه» بتاع أكيد الفرخة خريجة مدارس أجنبى أو أنها باضت بعملية قيصرية وهو تحفيل يستمد ظرفه من اسم المنتج الصراحة. 

لكن خلاص الأستاذ اللى هناك ضحك؟

طب الكابتن اللى على شمال الأكاونت شير البوست؟

 طب والكابتن أبو تى شيرت أصفر كتب تعليق واخدانا على فين يامصر؟

والآنسة صاحبة أكاونت حجابى سر جمالى ترحّمت على أيام لمّا كانت أنهار اللبن والعسل والخمر تنبع من ميدان التحرير؟

طب حد عارف إيه السبب فى ارتفاع الأسعار؟!

طب حد عارف ليه أسعار الغذاء بترتفع فى العالم كله مش فى مصر بس؟ 

بعيدًا عن تفسيرات نظرية كرتونة البيض للنخب المصرية فقد حذرت منظمة الأمم المتحدة من ارتفاع أسعار الغذاء فى العالم بوتيرة هى الأسرع منذ أكثر من 10 أعوام.

 مؤشر منظمة الأغذية والزراعة التابع للأمم المتحدة (فاو) رصد ارتفاعًا فى أسعار الأغذية فى العالم، من بينها الحبوب والزيت ومشتقات الحليب واللحوم والسكر، وبيّن أن أسعار الأغذية سجلت ارتفاعًا بنسبة 39.7% فى مايو الماضى، وهو أكبر ارتفاع شهرى لها منذ أكتوبر من عام 2010.

أوروبا ارتفع فيها معدل التضخم؛ خصوصًا بعد زيادة أسعار الطاقة بمعدل 13.1% خلال شهر مايو الماضى، وهو أعلى معدل سنوى للزيادة مقارنة بكل مجموعات السلع الأخرى وسعر برميل البترول تجاوز مستوى الـ70 دولارًا للبرميل لأول مرّة منذ سنوات.

أزمة تانية وهى ارتفاع أسعار الشحن منذ نهاية نوفمبر الماضى وهى تسجل صعودًا كبيرًا وصل لمستويات قياسية، مسببة أزمة عالمية فى مجال الشحن.

وتلقت صناعة الشحن ضربة أكبر عندما أعلنت السُّلطات الصينية إغلاق جزء من ميناء نينغبو تشوشان أحد أكبر مرافئ العالم بسبب وباء كورونا.

 وعشان تعرف أهمية الميناء ده لازم تعرف أن السَّنة اللى فاتت عبرت بضائع يصل وزنها إلى 1.2 مليار طن من هذا الميناء فقط وهو الثالث فى العام من حيث الشحن.

وإغلاق الصين لهذا الميناء تسبب فى زيادة الطلبات على الشحن وتعطل حركة الملاحة وأن المَراكب تقف فى البحر وده معناه تكاليف أكتر لأن تعطل المراكب يعنى زيادة مصاريف تشغيلها هو ما يعنى زيادة فى تكلفة الشحن عامة.

وبحسب تقرير لشركة ماكينزى فإن حاوية الشحن من الصين إلى أوروبا تكلف حاليًا 6 أضعاف ما كانت تكلفه فى بداية عام 2019، والحاوية التى كانت تبلغ مصروفات شحنها من الهند إلى مصر مثلًا 3500 دولار وصلت الآن 6 آلاف دولار، أمّا من الصين بدلًا من ألفَىْ دولار أصبحت 12 ألف دولار وأكثر.

كمان ارتفعت مدة وصول البضائع من مناطق أوروبا والصين بسبب عدم وجود حاويات فارغة سواء للاستيراد أو التصدير.

زيادة أسعار الشحن العالمية رفعت أسعار السلع المستوردة فى مصر 30% بجانب زيادة فى أسعار الخامات العالمية بلغت 10% مما يعنى أن الزيادة الإجمالية وصلت إلى 40 %. الكلام ده يعنى إيه؟ 

يعنى إن فيه موجة ارتفاع أسعار قادمة فى العالم كله بما فيها مصر وحتى فى تركيا وقطر يامؤمن..............تخيّل؟ 

وأن الأسعار هترتفع بنسبة 40% على أى منتج مستورد.. 

واحد هيقولى يا كابتن طب البيض ده منتج مصرى واحنا عندنا اكتفاء من منتجات البيض والدواجن.. 

وأردّ عليه أقوله بالفعل الإنتاج محلى لكن عوامل الإنتاج مش محلية، بمعنى إننا نستورد العلف والأدوية والتحصينات ودى أسعارها ترتفع بحكم اللى شرحته بالإضافة إلى جشع معظم التجار. 

فيه حد تانى ممكن يسأل: طب هو ليه أسعار الطاقة ارتفعت؟

 أقوله أثناء أزمة كورونا كان فيه إغلاقات لمصانع وتقليل عدد العمالة والورديات وحتى تقليل عدد الموظفين وبالتالى قل الطلب على الطاقة، لكن لما بدأت الأنشطة الاقتصادية ترجع إلى طبيعتها بشكل تدريجى حول العالم أدى إلى زيادة الطلب على مدخلات الإنتاج بما فيها الطاقة.

 كمان عودة مواطنى العديد من الدول؛ خصوصًا الدول الكبرى، وذات الكثافات السكانية الكبيرة، تدريجيًا إلى ممارسة حياتهم بشكل طبيعى، ساهم بدوره فى زيادة الطلب على الطاقة من خلال استهلاك المزيد من الوقود، هذا بجانب توسع هؤلاء المواطنين فى الطلب على السلع الاستهلاكية، وهو ما غذّى بدوره الضغوط التضخمية. يضاف إلى هذه الأسباب، استمرار الحكومات فى الإنفاق الكثيف على خطط التحفيز الاقتصادى؛ خصوصًا فى الولايات المتحدة الأميركية وأوروبا، يعنى بيخلوا المواطنين يشتروا بكثافة عشان حركة الأسواق وكل الناس تشتغل بس المشكلة أن الإنفاق الضخم ده لا يقابله إنتاج ضخم يوازيه وبالتالى تزيد الأسعار ويرتفع التضخم.

طيّب المفروض نعمل إيه كدولة وكشعب؟

أول حاجة نعرف احنا كدولة وكشعب إيه اللى بيحصل حوالينا فى العالم ونركن نظرية كرتونة البيض على جنب، وبلاش نظرة خبراء السوشيال ميديا أحفاد البوم والغربان اللى شايفين الدنيا سودة فى مصر فقط وإن العالم بيعيش فى نعيم ما عدا مصر، مع أنه لو كلف خاطره وقرأ أى جريدة خليجية هتلاقيهم بيعانوا من ارتفاع الأسعار ولو قرأ جريدة أوروبية وأمريكية هيشوف معاناة الناس بسبب ارتفاع أسعار الوقود والغذاء، احنا كشعب وكحكومة مطلوب مننا نقلل الاستيراد إلى أقل قدر ممكن يعنى لو نقدر نصنع أمصال وعلاجات الدواجن والعلف الخاص بيها لازم نبدأ فورًا عشان ما نتعرّضش لأزمات السوق العالمية، يعنى ارتفاع سعر الطاقة زود الأسعار 10 % لكن زيادة مصاريف الشحن زودت الأسعار 30% تخيل لو مش محتاجين استيراد يبقى كل اللى ممكن يزيد عندنا هو نسبة 10%.

  ثقافة التصنيع المحلى لازم تسود 

إنقاذ مصر فى التصنيع وامتلاك القدرة اللوچستية على توفير معظم احتياجاتنا بنسب كبيرة لو فيه دور كبير للحكومة إنها تضع خطة اكتفاء ذاتى من سلع ومنتجات خلال عشر سنوات فلازم يكون فيه دور كبير للقطاع الخاص.. احنا سوق كبير ومفتوح وعيب إن كبار رجال الأعمال يتحولوا إلى كومسيونجية للشركات الصينية لأنه مش عاوز وجع قلب ويبنى مصنع ويشغّل عُمال طالما بيكسب 3 أضعاف من الاستيراد. 

محتاجين رجال أعمال مش رجال مال ودول كتير فى مصر بالمناسبة. 