جوزك على ما تعوديه.. الخناقة خلصت
رغدة أبورجب
الفرق كبير ما بين الرجل والمرأة خصوصا فى الخناقات.
الخناقة عنده سهلة جدا وبتخلص بسرعة، زعل، اتعصب، قفش، لبس ونزل، راح مع أصحابه، الخناقة خلصت (لأنه مش فاكر أساسًا سببها إيه) رجع البيت، نام، الموضوع انتهى.
المرأة عندها مراحل مختلفة للخناقة، زعل وغضب، عصبية، عياط، عياط، مرة كمان عياط، وبعدين بوز، وده بيقعد معانا شوية حلوين.
والموضوع مش بينتهى عند البوز فقط، لا إحنا بنجيب خناقات قديمة نستشهد بيها وممكن مواقف من سنين تؤكد موقفها.
الفكرة إن المرأة بتتمتع بذاكرة جبارة فى الخناقات.
ده طبعا بينعكس على البوز اللى بعد الخناقة.
الرجل بيبقى مش فاهم سبب البوز إيه، بجد مش بيكون فاكر، الموضوع خلص معاه فى ساعتين فهو مش مستوعب إنها لسة بتفكر فى نفس الموضوع.
بس ظروف الرجل وإمكانية خروجه مع أصحابه بيقلل ضيقه، عكس الزوجة اللى غالبا ما بتكون فى البيت مع الولاد ومش بتقدر تنزل تخرج وتسيب الولاد فا ده بيخليها فى مود الزعل أكتر، والموضوع بيكبر معاها.
لازم الرجالة تحترم زعل المرأة وتقدره، وفى نفس الوقت لازم الست تكبر دماغها شوية وتخفف من موضوع البوز ده، الدنيا مش مستاهلة فى الآخر هيموتونا ويقعدوا هما.
