جوزك على ما تعوديه.. دلعوهم تلاقوهم
رغدة أبورجب
مش معنى أن الراجل هو مصدر الأمان للست إنه ميحسش بيه أو ميطلبوش الراجل بيشعر بالأمان بشكل تانى غير الست.
أمان الراجل بيجى من راحة باله وشعوره أن بيته مستقر وأن زوجته وراه و بتحميه وساندة ظهره.
إنكم مع بعض ساندين بعض فى كل المواقف سواء وحشة أو حلوة ده أهم أنواع الأمان بالنسبة له.
الراجل محتاج بيته يكون هادى علشان يقدر يبقى مطمن وهو بيدخل فى مشاكل الشغل وضغوط المجتمع، لازم يحس إنه اختار صح وأن شريكة حياته بتفهمه من قبل ما يتكلم من نظرة عينه وأن مواجهته لكل ضغوط الحياة دى علشان يحافظ على العلاقة.
لازم الراجل كمان يحس إنه متشاف وأن مراته بتحبه وبتقول له كلام حلو من وقت للتانى، وبيحب يحس إنه جميل وإن شكله حلو. هما كمان بيحبوا الكلام الحلو والدلع من وقت للتانى.
لازم يحس إنه بقرار الزواج ده كسب مخصرش وأن حياتكم مع بعض أحلى وأكتر استقرارًا .
حطوا المشاكل قدامكم مش ما بينكم لازم يحس إنه بيدافع عن حبه مش مجرد بيت وأولاد خايف عليهم من مشاكل الانفصال والطلاق.
فكره الانتقال من إنى عايش معاها علشان البيت والأجهزة الكهربائية إلى إنى بحبها ومقدرش أعيش من غيرها، هو ده النجاح الحقيقى.
