الأڤوكاتو

أڤوكاتو كلمة إيطالية معناها محامى، ومهنة الأڤوكاتو ظهرت على الشاشة وفى السينما مرات كتير، سيدات ورجال قدموا الدور ده وكان منهم شخصيات مميزة جدًا فى أدوارها.

دورين قدمهم عادل إمام لنموذجين من المحامين: المحامى حسن سبانخ، خفيف الظل الذكى جدًا فى استغلال ثغرات القانون لصالح موكليه وبيطلعهم براءة. 

فى مرة وهو بيترافع فى أحد القضايا بياخد حبس شهر لإهانته لهيبة المحكمة، فى الشهر ده بيعمل علاقات ملتوية وبيلعب على كل الحبال.

الفيلم التانى لعادل إمام هو طيور الظلام وجسد فيه دور فتحى نوفل المحامى الانتهازى  الليّ بيصعد اجتماعيًا وبيبقى مدير مكتب أحد الوزراء وتمر أحداث الفيلم وينتهى الأمر بنوفل فى السجن.

الست جسدت دور المحامية فى عدة أفلام، نتذكر منهن الأستاذة فاطمة الليّ لعبت دورها فاتن حمامة والليّ كانت بتحب جارها وزميلها فى الجامعة. لكن لما بيتخرجوا كل واحد بيفتح مكتب محاماة ولكن هى مبيجلهاش زباين علشان هى واحدة ست على عكس عادل الليّ مكتبه شغال زى النار، وبتتحول القصة لما عادل شخصيًا بيتورط فى قضية قتل ظلم وبتترافع عنه فاطمة وبتكسب القضية بكل فطنة وذكاء.

واحدة تانية مثلت دور محامية وكانت بتدافع عن سيدة قتلت جوزها، عنايات عبدالحميد ودى قامت بدورها الجميلة ليلى طاهر ودافعت عن الدكتورة هدى الليّ قتلت جوزها وهى تشاهده بيخونها واتحكم عليها بـ15 سنة سجن مع أن فى حالة ثبوت الخيانة من طرف الست لو جوزها قتلها متلبسة بياخد شهر مع إيقاف التنفيذ.. كان الفيلم جريئا جدًا فى وقته وتكلم عن المساواة المفقودة بين الرجل والمرأة.

نعود للمحامين الرجال على الشاشة وواحد تانى كان شخصية عمومًا مثيرة للجدل وهو المحامى جاك فيرجيس محامى جميلة بوحريد المناضلة الجزائرية والليّ قدمه فى الفيلم محمود المليجى. فيلم جميلة من أفضل ١٠٠ فيلم فى تاريخ السينما المصرية وفيه تولى جاك الدفاع عن جميلة حتى تبرأت من. القضايا.

وبالطبع لا يمكن ننسى المحامى الفصيح الليّ قدمه الخفيف الظل السكر إبراهيم سعفان فى عدة أدوار من اشهرها 30 يوم فى السجن فى درر المتر سفاجة.

أما أفضل من قدم دور المحامى فى رأيى فهو القدير الأسمر أحمد زكى فى ضد الحكومة فى دور المحامى مصطفى خلف.

الفيلم فيه جملة أيقونية «كلنا فاسدون، لا استثنى أحدا حتى بالصمت الموافق قليل الحيلة». 

جملة مركبة ولكنها بسيطة بتشرح السلبية الموجودة فى معظم نواحى الحياة.

زى العلاقات واستمرار علاقات متوفاة من سنين علشان محدش بياخد خطوة وسلبية فى الشغل علشان كله بيتعامل زى الموظفين الليّ بيتجدد ولاءهم مع مرتب كل شهر.

المحامى ظهر فى أفلام كتير ومع ظهوره يحيا الحق أحيانًا.. أو لا يحيا.. لأن المحاماة كأى مهنة مهم فيها ضمير الأڤوكاتو نفسه.