البهظ بيه
منى رضوان
سليم البهظ أو البهظ بيه زى ما بينادوه فى الفيلم شخصية جسدها جميل راتب بعبقرية بالغة فى فيلم (الكيف) مع محمود عبدالعزيز ويحيى الفخرانى.
بيقوم بدور تاجر مخدرات معندوش بربع جنيه مبادئ بيلعب على شهوات الناس وإدمانهم للكيف وبيعمل خلطة بيكتسح بيها السوق وبيحقق مكاسب خيالية.
مشاهده وجمله الحوارية وإفيهاته فى الفيلم كانت بالضبط ما أسميه بالإقناع الشيطانى، بيقول كلام فيه ألفاظ كتيرة غير مفهومة مغلفة بمنطق مغلوط بس يبدو ظاهريًا أنه كلام مش سطحى وممكن يدخل دماغ قاعدة مش قليلة من الناس، جوهره خاطئ ومحتواه منحط وكمان بيقوله ببجاحة رهيبة.
عنده لكل شىء مبرر ورد، حتى شغلته كتاجر مخدرات بيبررها بنفس المنطق العجيب الملتوى الليّ واضح جدًا فى مشاهده.
البهظ بيه بيحكى تاريخه المنيل وأنه كان بيشتغل فى الكيف بكل أنواعه من زمان، الراجل وأخد السلم من أوله، ابتدا بالبُن والشاى - لما كان بيتاجر فى الشاى كان بيغشه بنشارة خشب ويحطه فى أكياس ويبيعه وعمل فلوس كتير وبعد كدة نشارة الخشب غليت والنجارين بطلوا يبيعوها فاتخرب بيته والزباين قالوا عليه أنه بيغش الشاى - وطبعًا منطقه أن الناس هم الليّ مغفلين واتعودوا على الشاى البايظ ومبقوش عارفين يميزوا الأصلى من المضروب.
ولما الدكتور صلاح (يحيى الفخرانى) قاله إن ثبت علميًا أن الخلطة بتاعته بتاعة الكيف بتسبب سرطان الرئة رد عليه بكل ثقة أن ده كلام فارغ. وأضاف إن مفيش حاجة الناس سابتها ومقالتش عليها بتجيب سرطان وقاله كلام أهبل معناه أن صحتنا إحنا كمصريين غير صحة الناس التانية لأننا فراعنة وبدل الهرم بنينا تلاتة والحاجات الليّ أثبتتها الأبحاث دى كلها يروح يبلها ويشرب ميتها لأنها مش منطبقة علينا.
وبعدين دخّله بقى بالتقيلة وقاله إن الناس إللى بتموت من الكيف ده قدرها ومحدش بيموت ناقص عمر.. وقاله خليك مؤمن!!
على قد ما شخصية البهظ بيه قبيحة ووحشة وفلسفتها شيطانية بس كان عندها كاريزما وقالب بشرى واقعى بنشوف بالفعل زيها ناس حوالينا وبيكون عندهم مَلكة كبيرة فى قلب الأمور وتحويرها واختراع حكايات عنها وترويجها وتصديقها، بيكون عندهم قدرة أنهم يقنعوا الغير بها ده غير اقتناعهم الشخصى هم بيها وإيمانهم بالحاجات المغلوطة إلليّ بيقولوها وبيرددوها زى البغبغانات.
البهظ بيه شخصية فيها رمزية كبيرة - رمزية فى أن كتير بيعرفوا يغسلوا العقول وبينتقوا كلامهم ويلعبوا به على أوتار كسبانة زى الحب والدين وربنا وإننا ناس مختلفة ولا تسرى علينا القواعد العادية.
على قد ما الشخصية شديدة الشطط وفيها مبالغة كبيرة إلا أن الخط العام لها موجود - على اختلاف قوته من حد للتانى.
فنشوف ناس بتاعة كلام رنان وكبير ولها منطق - منطق متشقلب يخلط الباطل بالحق والصح بالغلط ويطلع موسى فرعون والعكس.
