الخميس 28 مارس 2024
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

جوزك على ما تعوديه.. ألِمّ إيدى إزاى؟

طبعًا دلوقتى بقى مشوار السوبر ماركت غالبًا ما بينتهى بخناقة كبيرة، وكأن السّت هى السبب فى ارتفاع الدولار أو لها يد فى قرارات سعر الصرف.



تلاقى الراجل من دول متحفز جدًا لمشوار السوبر ماركت وبيسأل زوجته دفعتى كام فى السوبر ماركت، وبيحاسبها على كرتونة البيض وكأنها بردو السبب فى ارتفاع أسعار الطيور بصفة عامة..

وبعدين كل شوية يقول لها مينفعش كل ده يدّفع فى السوبر ماركت، لازم تلمّى إيدك شوية.

أيْوَه حضرتك يعنى أعمل إيه؟ ألمِّها إزاى؟ أبَطل أجيب بيض، فراخ، لبن، زبادى؟ ولّا أجيبهم مرّة واحدة فى الأسبوع؟ ولمّا يخلصوا أقول للعيال مفيش بيض ولا لبن لحد آخر الشه؟!

يا جماعة الزوجة طرف معانا، ملهاش أى علاقة بوزارة المالية ولا البنك المركزى هى بس بتشوف طلبات بيتها الضرورية وبتجيبها، متحمّلهاش ضريبة ارتفاع الأسعار، هى مش الشماعة اللى بتعلق عليها ضغطك العصبى.

طبعًا أنا هنا بتكلم عن الستات الواعية اللى بتشترى الضروريات بعيدًا عن الرفاهيات، وده غالبًا حال أغلب السّتات حاليًا؛ لأن الرفاهية مش موجودة أوى حاليًا نظرًا لارتفاع الأسعار فى السلع الأساسية، أنا مش بتكلم عن أن الزوج بيتخانق علشان السّت بتجيب رفاهيات؛ لا، على الزوج اللى مش مستوعب ارتفاع الأسعار وبيحاسبها على الحاجات الأساسية وكأنها هى السبب..

كلنا فى الهوا سوا، فا بدَل ما كل شوية تدّيها كلمتين إنها السبب الرئيسى فى إنهاء مصروف البيت سريعًا؛ فكّر معاها إزاى توصلوا بالمصروف إلى بَرّ الأمان، أو مثلاً انزل معاها السوبر ماركت وشوف احتياجات البيت وافهم الأسعار وصلت لفين وكفاية تنظير على السّت الغلبانة اللى بتحاول تخفف الضغط من عليك. فا ياريت كفاية تنظير واتفضّلوا انزلوا إلى أرض الواقع وحاولوا معانا نجد حلول عملية يمكن تنفيذها.