جوزك على ما تعوديه.. السيطرة على التليفزيون من حق الزوج حتى انتهاء كأس العالم
رغدة أبورجب
طبعا مع هوجة الماتشات وكأس العالم بتكون السيطرة على التليفزيون للرجل والمساس بالريموت كأنه المساس بالأمن القومى للبيت.وممكن المساس به يؤدى بيكى إلى التهلكة لذا عليك سيدتى الجميلة بتأجيل كل مسلسلاتك التركى اللذيذة إلى ما بعد الماتشات.
أنا عارفة أن وراكى حلقات لازم تخلصيها وتأخيرك فى المشاهدة حتخلى أصحابك يسبقوكى فى الأحداث، بس لا تقلقى لأن وضع أصحابك فى البيت هو نفس وضعك، السيطرة الآن للرجال ومش معنى أن مفيش ماتش حاليا أنه حيتخلى عن الريموت لك، أبدا وأول لما تيجى تمسكى الريموت علشان تقلبى القناة حتلاقيه انتبه وجت له رعشة وبدأ يتوتر ويسالك أسأله غريبة عن سبب سؤالك عن الريموت، أصلً بعد أربع ساعات فى ماتش عاوز أتفرج عليه، أيوه حضرتك ما هو لسه بدرى.. حيقول لك بدرى من عمرك ده الوقت بيجرى بسرعة، شوفى إحنا بقالنا كام سنة متجوزين والوقت بيمر بسرعة إزاى.
حتلاقى نفسك دخلتى فى حوارات غريبة فا الأحسن ليكى إنك متحوليش تسألى عن الريموت طيلة وجوده فى البيت.
وفى حالة عدم وجوده فى المنزل تلاقى أحباب الله منقسمين على التليفزيون حد عاوز يتابع الكورة والماتشات والثانى عاوز الكرتون.
فافكره إنك تعملى نسكافيه أو شاى وتقعدى تتفرجى على التليفزيون فى جو من البهجة والهدوء والسعادة حلم بعيد المنال.
معلش كلها أيام معدودة وتعود سيطرتك على التليفزيون ومسلسلاتك التركى مرة أخرى.
أما حاليا فالبعد عن الريموت والتلفزيون إكرامًا ليكى، والأحسن كمان وكمان إنك تسيبى جوزك فى حالة غرام وهيام مع التليفزيون لوحده مش لازم تشاركيه فرجة الماتشات لأنك غالبا ما تصابى بالتوتر من كتر تشجيعه وحماسه اللى إنتى شيفاهم غير مبررين، وده نفس شعوره وقت ما بتشوفى كريم فى ستيلتوا ولا أى بطل من أبطال المسلسلات التركى أو اللبنانى اللى بتبعيهم، فامعلش التليفزيون بتاعهم لحد انتهاء البطولة وبعدها ارجعى بقوة إلى مسلسلاتك الجميلة.
