جوزك على ما تعوديه.. تعليمات مشاهدة مباريات كأس العالم

مع بداية كأس العالم سيدتى الجميلة عليكى بالحرص الشديد من الاقتراب من بعيد أو من قريب من مواعيد الماتشات؛ لأن مفيش حاجة اسمها ماتشات مهمة أو غير مهمة، كلها بالنسبة للرجال ماتشات فى غاية الأهمية.

طبعًا مش محتاجة أشرح لكِ أنه حدث مهم وبيحدث كل 4 سنوات فا ده موسم القهوة والأصحاب. وطبعًا ممكن جدًا تلاقى أصحابه كلهم جايين يتفرَّجوا على الماتش عندكم، فا طبعًا لازم يكون عندك استعداد فى تحضير آكل وفشار ومشروبات لأى عدد.

مش محتاجة أفهّمك أن مناقشة أى حاجات أو مواضيع مهمة تؤجل إلى ما بعد البطولة، لو خبر لا يحتاج التأجيل زى مثلا وفاة حد أو عيل من العيال درجة حرارته 40 ومضطرة تبلغيه يبقى لازم بعد الماتش، أوعى تفتكرى إن وقت إعادة الجون ده وقت مناسب لسؤاله فى أى حاجة،أبدًا إعادة الجون أهم من الجون نفسه.

وطبعًا مش محتاجة أشرح لك أهمية الاستوديو التحليلى اللى بيكون قبل وبعد وفى منتصف المباراة.

بُعدك عن حيز ونطاق التليفزيون بينقذك من خناقة كبيرة، واحتمال إصابات، المنطقة اللى بينه وبين التليفزيون تُعَد من المحرمات عليكى تجاوزها حتى ولو للضرورة اعتبريها منطقة حرب.

طبعًا مش محتاجة أوعيكى بأن سؤالك التقليدى أنا أهم ولّا الماتش، ملوش أى لازمة لأن إجابته حضرتك هى الماتش طبعًا، فا يا ريت بلاش نوعية الأسئلة دى لأن إجابتها حتزعلك أنتى.. 

وفى نوع تانى من الأسئلة مرفوض بردو، يعنى هو مين ومين اللى بيلعب، كام كام، كل ده مكتوب على الشاشة ولو مش عارفة مش مهم تعرفى جوجل حبيبتى، وبلاش بقى نوعية هو مين اللاعب ده واسمه إيه وبيلعب فى نادى إيه، كل دى أسئلة مش مهمة بالنسبة لكِ وبتسأليها إيبان الماتش فا طبعًا حيتعصب عليكى.

آخر حاجة أحب أوصيكى عليها وطبعًا أنا متأكدة إنك مش حتعملى كده فى نفسك بس أحب أوكد أوعى تقولى له وطى التليفزيون، دى ممكن يكون فيها طلاقك، صوت المعلق والجماهير ده أهم بالنسبة لهم من أى صوت مغنى حضرتك بتحبيه، فا أرجوكى أوعى تقولى له وطى التليفزيون. 

باختصار ممكن تاخدى شنطة هدومك وتروحى وقت الماتشات عند السّت الوالدة، ده حيكون أفضل للأسرة من التشتت والخناق وإن شاء لله فترة وحتعدى ونرجع تانى نسيطر زى الأول، سيبوهم شوية يخدوا نَفَسهم مش عيب ده مجرد فاصل ونعود.