افتح يا سمسم
منى رضوان
افتح يا سمسم أبوابك نحن الأطفال، افتح واستقبل أصحابك نحن الأطفال
لالالالا لاا.. لالالا لالالالا لاا.. لالالا
افتح افتح، نفرح نفرح، افتح فرجينا حيينا دنيانا جمال
لالالالا لاا.. لالالا...لالالالا لاا.. لالالا
بالكلمات دى كان بيبتدى واحد من أشهر برامج الأطفال فى العالم العربى لو مكانش الأشهر على الإطلاق.
البرنامج ده أصله هو برنامج أطفال غربى اسمه Seseme Street وتم تعريبه من خلال بلاد مجلس التعاون الخليجى واتعمل منه جزء أول سنة 1979 وبعد كده جزء تانى سنة 1982 ومن ساعتها بقى شىء شّكل طفولة أجيال وأجيال من الأطفال.
البرنامج اتعمل منه 390 حلقة وهو تعليمى وتربوى فى مضمونه بس بشكل ترفيهى محبب للقلوب -سواء كنت كبير أو صغير- افتح يا سمسم برنامج هتحبه وتتأثر بيه.
شخصيات البرنامج اتعدلت للتوافق مع المبادئ العربية والقيم المختلفة للمجتمع الشرقى، بعض الشخصيات من البرنامج الغربى فضلت زى ما هىّ وبعضها التانى اتغيّر.
كل الشخصيات من الدمى ومعاها فى أبطال وممثلين من البشر، كل الحكايات فيها ده وده فى تجانس مذهل.
نعمان من أهم شخصيات البرنامج وأقربهم لقلب الأطفال وهو عبارة عن جمل عربى أصيل وهو شخصية طيبة فى المطلق وجسمها من الفرو البنى واتعملت فى النسخة العربية فقط.
ملسون وده بغبغان لونه أزرق وعنده منقار أصفر كبير، شكله جذاب بسبب جمال ألوانه والأطفال بتحبه. بدر وأنيس ودول اتنين أصحاب جدًا.
بدر دمية على شكل راجل، لونه بشرى ومناخيره برتقالى، حواجبه لازقة فى بعض وشكلها نص قوس كامل من غير مسافة، بيلبس هاى كول أبيض ولبس مخطط بالطول أخضر فى أحمر فى بنفسجى، عنده ضبط نفس عالى خصوصًا بعد المقالب الليّ أنيس بيعملها فيه.
أما أنيس فهو دمية بشرية لونها برتقالى، دمه خفيف وبيضحك ولابس لبس مخطط بالعرض أحمر فى أزرق وبينهما فواصل خطوط بيضا وصفرا.
نيجى بقى لأكتر شخصية بتحب الأكل وده اسمه كعكى واسمه مشتق من الكعك، بياكل باستمرار، جسمه متغطى بالفرو الأزرق وعنيه جاحظة وبقه مبيبطلش لعب ومضغ وبلع فى الأكل، كعكى شخصية تحاكى cookie monster فى النسخة الإنجليزية.
أما الضفدع كامل أو Kermit The Frog فده من أشهر الشخصيات، هو ضفدع أخضر عينه منفوخة شوية وفمه واسع وله شخصية فكاهية جدًا.
أما جرجور فده كمان دمية، لونها أزرق غامق ومن الفرو ومنخيره حمرا.
افتح يا سمسم شمل شخصيات تانية كتير زى شمس ورويدا وبشيش وزهرة وده غير ناس قاموا بأدوار المعلمة فاطمة وجوزها حمد النجار والكهربائى هشام والدكتورة ليلى ومامتها، والبياع عم عبدالله وخليل صاحب المطعم. برنامج أطفال خالد.. وجملته السحرية «افتح يا سمسم أبوابك نحن الأطفال» كانت بتفتح عالم ساحر للأطفال وللكبار.
