الأربعاء 30 نوفمبر 2022
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

سكوبى دو وبندق وپلوتو

عالم الكارتون عالم ساحر زَيّه زى عالم الكلاب بالضبط.. أنا عاشقة للاتنين لذا من الطبيعى أن بعض شخصيات الكارتون المفضلة عندى تكون من كلاب- هحكى لكم عن أفضل 3 شخصيات كارتونية كلابية عندى وهقولكم مين أكتر واحد بحبه.



أول كلب هو «سكوبى دو»: 

«سكوبى دو» ده شخصية خيالية وبطل مسلسلات تحمل نفس الاسم، ظهر أول مرة سنة 1969 وتملكه شركة رسوم متحركة أمريكية اسمها «هانا- باربيرا» كانت موجودة لحد سنة 2001.

«سكوبى دو» كلب من فصيلة الـ جريت دين Great Dane وهو الصديق الصدوق لشاجى روجرز وهو شبه صاحبه أوى. «سكوبى دو» كشخصية هو خليط من كلب وبنى آدم وبينه وبين صاحبه خليط من الصفات المتشابهة وكومبو فيه شوية من السلوكيات البشرية وسلوكيات الكلاب. أصحابه بيعاملوه أنه فرد منهم وصوته شبه الكلب شوية واسمه الدارج «سكوبى دوبى دو».

تانى كلب هو «بندق»: 

«بندق» هو شخصية رسوم متحركة من شخصيات والت ديزنى، ظهرت أول مرة سنة 1932 وهو كلب طويل فى شكله وهيئته بشرية بس هو كلب المفروض.

أكتر حاجة بتميزه أنه مش ذكى أوى وده شىء عكس الكلاب ومدّهول شوية وده بيحطه فى مواقف تضحّك إلى حد كبير.

«بندق» هو الصديق المقرب لميكى ماوس وبطوط- مغامراته بسبب دهولته دار عنها حلقات كتير من الكارتون. لبسه واسع وفضفاض جدًا وبيمشى مشية غريبة وله ضحكة مميزة ومع أنه كلب بس بيمشى على قدمين مش أربعة وبيتكلم مش بيهَوْهَو.

«بندق» كان بطل مع أصحابه فى حلقات الكارتون وكمان اتعمله فيلم من بطولته سنة 1995 اسمه (مغامرات بندق) وهو معروف كمان باسم «جوفى»، سلالته غير معروفة نظرًا لأنه فى كل صفاته أقرب للإنسان منه للكلب. تالت كلب هو «پلوتو»:

«پلوتو» هو كلب ميكى ماوس الأليف وأقرب صاحب له، وهو من سلالة مختلطة.

ظهر أول مرة فى دور كلب بوليسى ومكانش له اسم وده كان فى فيلم قصير وبعد كده ظهر فى حلقات الكارتون. «پلوتو» شخصية مميزة جدًا ومختلف كشخصية فى عالم ميكى لأنه مش كلب بشرى، هو طالع أنه كلب أليف ومش بيتكلم وبيمشى على أربع أرجُل (غير بندق). الحاجة الوحيدة اللى بيعملها زى الناس بالضبط هى تعابير وشّه وحركاته المعبرة أوى.

عالم الكارتون يأسرنى- الشخصيات اللى بحبها كتير، أكتر شخصية على الإطلاق هى الجميلة «پوكاهانتس» وهى من الهنود الحمر، ومن الكلاب بحب «پلوتو وبندق وسكوبى دو».. شخصيتى المفضلة منها هو «بندق»، بحبه أوى بشكله بلبسه بمشيته.. مش عارفة ليه؟ احتمال علشان حاسّة إن فيه أفضل ما فى الإنسان من عقل وكلام وما فى الكلب من حب ووفاء.

المهم قولى: أنت مين شخصيتك الكارتونية المفضلة؟