الطريقة السريعة للسعادة الزوجية

شوية حاجات كده أضمنلك أيُّها الزوج لو عملتها أمورك هتتحسّن مع المَدام والخناقات والخلافات هتنزل للنص.

1 - يا ربت تقتنع إن الطاسة التيڤال أو الجرانيت دى المفروض مقاومة للخَدش.. بس مش معنى كده إنك تختبر مقاومتها بأنك كل شوية تقطع حاجة جواها كل يوم بسكينة حادة.. أرجوك ركز لأن المدام طلبت منك الموضوع ده حوالى 60 مليون مَرّة.

2 - التلاجة جهاز كهربائى موجود فى المطبخ والمطبخ موجود فى البيت.. التلاجة مش مكان بنجيب كرسى قدامه ونفتحها ونُعُّد ناكل.. دى مش غرفة معيشة ولا غرفة طعام.. وباب التلاجة ده باب بإيد.. ليه؟ بالضبط علشان نقفله ونتأكد إنه اتقفل.

3 - أى بيت فيه بَشر عايشين بيبقى عندهم مكان يرموا فيه القمامة اللى ناتجة من المعيشة اليومية.. اللى هى الزبالة.. بما إنك عايش فى البيت ورَبّ البيت كمان فلمّا مراتك تقولك خد الزبالة معاك بيبقى قصدها إنك ترميها.. متأفأفش وتضرب بوز هى الست مش وكيل الزبالة فى البيت كفاية إنها بتلمها وبتختزل دورك إنك بس ترميها.. خليك متعاون الله لا يسئك فجملة لا معلش أصل أنا لابس وحاطط پرفان والجو ده بَطّله، هى طالبة تاخد الكيس فى إيديك ترميه على بُعد عدة أمتار، السّت مقالتلكش تاخده معاك وأنت مسافر وتحضنه على فكرة!.

4 -فى أوقات متتكلمش معاها فيها فى أى شىء.. تسيبها تكمل اللى هى بتعمله من غير ما تقاطعها، على سبيل المثال لا الحصر: وهى بترسم الآى لاينر أو بتحط الروچ أو بتتابع الحلقة 456538 من المسلسل التركى!.

5 -فى أماكن فى البيت ممنوع الاقتراب أو التصوير ودول زى النيش وكل مقتنياته النفيسة، إياك ثم إياك تفكر أو تسول لك نفسك إنك تقولها عايزين نستعمل الحاجات اللى فى النيش.. أنت مش فاهم أصلًا. الحاجات دى إن شاء الله هتطلع لما بنتكم يتقرى فاتحتها وبَعدها هيدخلوا تانى ويطلعوا على أول عزومة للعروسة لما تتجوز وتيجى هى وجوزها يتغدوا عندكم بشرط وجود أهل جوزها.. لو مجوش يبقى هتاكلوا فى الأطباق العادية وبلاش كُتر كلام.

6 -الست متجوزة راجل كبير.. فيا ريت لمّا تشرب من إزارة وتحط شوية فى كباية تقفل الإزازة وتغسل الكباية ولو مش عايز تغسلها حطها فى الحوض مش على طرف الترابيزة وتقع تتفشفش 50 حتة.

7 -الشامبو بتاع مراتك ده بتاع مراتك.. لو شامبوهك خلص متقربلوش روح خدلك شوية صابون من بتاع الأطباق أو اغسل شعرك بصابون غسيل الإيدين.. مَشّى حالك كده ومتستعملش غير حاجتك.

دى شوية حاجات كده لو عملتوها أصدقائى الرجال المدام هتسيبك تخرج مع صحابك وتسافر معاهم وكمان تلعب بلاى ستيشن.

قدّم السبت وإن شاء الله هتلاحقى الحد قدامك.. مع تمنياتى لكم بالتوفيق يا رجالة.