الأربعاء 7 ديسمبر 2022
رئيس مجلس الإدارة
هبة صادق
رئيس التحرير
أحمد الطاهري
رئيس مجلس الإدارة
هبة الله صادق
رئيس التحرير
أحمد الطاهري

تحويل مسار

تحويل المسار هو عملية جراحية بيعمل فيها الدكتور جيب صغير فى الجزء العلوى من المعدة بحيث تكون هى الناحية الوحيدة اللىّ بتستقبل الطعام وبكده بيقلل حجم المعدة فتصبح غير قادرة إنها تدفس أكل كتير جواها وبالتالى يقل حجمها، ده بيكون فعّال جدًا لإنقاص الوزن، من الآخر دى عملية بعدها بيخس الإنسان وميقدرش ياكل كتير.



نوع آخر من تحويل المَسار هو اللىّ بيحصل فى الشارع من تحويلات مرورية لمّا يبقى فى شارع بيتصلح أو أى شىء بيتعمله إنشاء، فيتعمل تحويل للمسار الحالى بحيث تستمر السيولة المرورية من غير أماكن اختناق أو زحمة.

المثالين السابقين دول الشىء الواضح لمّا نقول جملة تحويل مسار بس لو فكرنا وخدنا الكلمة لأكتر من معناها الدارج نجد أن هناك أنواع أخرى من تحويلات المسار فى الحياة الجديرة بالتفكير:

- تحول المسار من العقل للقلب: وبده أعنى أن القرارات اللىّ الناس بتاخدها بناء على التفكير المنطقى فقط ساعات محتاجة نفكر فيها بالتوازى بقلبنا ومنحسبهاش حسبة 1+1=2 وده لأن فى المعادلة أمور أخرى غير الحسابات زى الشعور والإحساس والإيمان بشىء ما.

- تحويل المسار فى النظرة للناس والحياة: ودى ما هى إلا إدراك أن الكون أكبر بكتير من البشر.. الكون كبير وفيه حاجات أكتر بكتير من أن نختزلها فى الشخوص المحيطة بينا.. فى الواقع إن أصغر حاجة فى الدنيا هم الناس وإحنا متبتين فيهم دونًا عن كل الكون المحيط بينا من أرض وسماء وبحار ومحيطات وكائنات أخرى...الناس مهمة مفيش كلام بس هم مش الشىء الأوحد فى الكون.. هم جزء مهم منه بس لازم نحول مسارنا لأننا نُدرك الحاجات التانية اللىّ المهمة فعلًا فى الكون.

- تحويل المسار نحو التغير: ده تحويل مسار فيه إن الأصل فى الأمور هو قبول التغير وأن لا شىء يبقى على حاله ولا حتى إحنا.. التغير سُنة الحياة وهو أمر نافذ لا هروب منه ولا فرار، لما بنقبله ونشوفه شىء أساسى فى الدنيا بنتقبله ومبنعدش نصارع طواحين الهوا.. التغير الإيجابى طبعًا شىء مهم وفى تغير سلبى نحاول نتفاداه وفى تغير وخلاص... وده أصعبهم لأنه إقرار إننا بنتغير والناس اللىّ حوالينا بتتغير وإننا كائنات بتتطور كل يوم ولا تقف عند شكل ثابت فى تفكيرها ولا تصرفاتها.. تحول المسار نحو التغيير مش معناه الموافقة عليه؛ بل تعنى تقبله والاعتراف إنه حاجة أساسية لا تقبل الجدل.

- آخر تحويل مسار وأهمهم فى رأيى هو تحويل المسار فى الاتجاه الذى يجعلنا النهاردة أفضل من امبارح وبكره أفضل من النهارده وإننا فى هذه الحياة لنكون فى صور أفضل مما نحن عليه الآن.