جوزائى منقرض
منى رضوان
الأبراج موضوع خلافى - فمن يراه «علم» بأصول وأنه مش شىء اعتباطى وأن وضع الشمس والنجوم والكواكب يوم ميلاد الشخص بتحدد كتير من صفاته وسماته الخاصة وعلاقاته بالناس من الأبراج التانية.
وآخرون شايفين أنه مش علم وأنه تنجيم أو ظاهرة ثقافية أو نفسية مش علمية.
سواء الناس شايفة كده أو كده يجوا عند برج الجوزاء وينزلوا تقطيع فيه - ماله مش فاهمة؟
أولًا برج الجوزاء برج هوائى وأصحابه هم المواليد من ٢١ مايو ل ٢١ يونيو وهو البرج التالت فى ترتيب دايرة الأبراج - رمزه خطين متوازيين شبه بعض وده قال إيه دلالة على شخصية الجوزاء الإزدواجية والمتقلبة.. افترا أوى الكلام ده.
أولًا ازدواجية إيه بقى.. خلاص مفيش ازدواجية غير عندنا؟ باقى الأبراج والناس مية فل وعشرة والجوزائيون هم اللى كده؟ طيب بلاش دى، مين من الناس حوالينا معندوش معايير مزدوجة حتى لو على خفيف ؟ يعنى عايزين تفهمونى أن الناس فى الشغل والحياة والعلاقات والتعاملات فى العادى مش مزدوجى الشخصية بس بتوع برج الجوزاء هم دونًا عن الناس كلها كده يا جدع؟!
أما الشخصية المتقلبة فدى بقى افترا أكتر من الإزدواجية لأن نص الناس لو مكانش كلهم بيبقى عندها تقلبات فى حياتها لأن دى سمة الحياة وبالتالى ده بينعكس على شخصيتهم - ده حتى الجو بيبقى متقلب، إيه جوزائى هو كمان ولا إيه؟!
موضوع التعميم ده وأننا نقيم برج بأكمله غير أنه مش صحيح فهو كمان غير منطقى، الفكرة اللى متاخدة عن الجوزاء مخلية الناس متبرمجة أنه برج مجانين - وساعات بيبقوا عارفين بعض من فترة ولمجرد أن يتعرف أنهم جوزاء يا ولداة يبقوا فى دائرة غريبى الأطوار.
أنا قعدت سنين أعرف ناس وميعرفوش أنيّ جوزاء ولما عرفوا سمعت تعليقات زى: لا أنت طبيعية متقوليش كده أو لا إحنا ناخد بالنا بعد كده.. ناخد بالنا من إيه سيادتك، ده أنت ماشى بتتقلب فى السمنة البلدى مش بس فى الحياة.
وكله كوم والليّ بيحصل فى شهر سپتمبر ده كوم تانى لما يبتدى كارهو الجوزائين يبثوا أفكارًا سلبية علينا ويقولوا يا ريت تقللوا الجواز فى شهر ٩ علشان ساعتها بتخلفوا ناس فى شهر ٥ و٦ ويقعدوا يجننونا بقية عمرنا - ليه كده يا إخوانا، راعوا نفسيتنا ميصحش احنا بنتهزأ علنى.
انتوا عايزين البرج ينقرض؟ على فكرة برج الجوزاء مصنف أصحابه من الأكثر نباهة - عدد أصحاب البرج الليّ فازوا بجوايز نوبل هو الأعلى من أى برج تانى - وبعدين بلاش نوبل، ده برج مارلين مونرو وأنچلينا جولى ومورجان فريمان وبوب ديلان وزبيدة ثروت وأحمد مكى وأحمد خالد توفيق وكمان مو صلاح.. ها حلو بقى مو صلاح ولا ده كمان هنقول عليه حاجة؟! # جوزائى_منقرض
