جوزك على ما تعوديه.. باسووردك معايا
رغدة أبورجب
أغلب الرجال حاليًا بيحطوا باسوورد على موبايلهم بحجة الشغل وأن الأولاد بيلعبوا فيه، طبعًا ده كلام معقول ومفهوم جدًا، لكن اللى مش مفهوم إن الباسوورد يبقى سر على الزوجة.
الباسوورد ده يبقى سر على مصر كلها لكن مش على مراتك. ومن حقها تعرفه لأنها ممكن تتعرض لموقف تحتاج فيه إنها تستخدم موبايلك وتطلب منه، مينفعش إنها متعرفش تفتحه، افرض أن موبايلها باظ أو فصل شحن ومحتاجة حاجة ضرورى، دكتور إسعاف مثلًا لأنك جالك جلطة أو ضعف فى عضلة القلب تفضل بقى تحاول تفتح موبايلك وأنت بتموت علشان تطلب الدكتور متزعلش بقى لما تستنى لما تشحن موبايلها.
أنا مش بقول على الإسعاف أو البوليس لأن الموبايلات فيها رقم طوارئ، أنا بتكلم على الدكتور أو موقف مهم محتاجين تليفونك.
ولو مصمم إن الباسوورد يبقى سر متزعلش بقى لما هى كمان تخفى عليك باسوورد موبايلها.
ما هى الحياة خد وهات يا جماعة حتمشى تمام وتقول باسورد موبايلك حتعيش عيشة فل، حتعمل فيها المفتش كرومبو متزعلش من اللى حيحصل.
صدقنى اديها الباسوورد بمزاجك أحسن ما تخده غصب عنك وتبقى عامل فيها حويط ومحدش عارف إيه اللى جوا موبايلك وهى لاقطة رقم الباسوورد وبتفتحه وحضرتك فى الحمام.
صدقنى الباسوورد حيحل لك مشاكل كتير انت فى غنى عنها.
