لغز الشاى بلبن
منى رضوان
الناس لها اتجاهات وأفضليات، ناس بتحب الأهلى أو الزمالك، عبدالوهاب أو بليغ، عبدالحليم أو أم كلثوم، الصيف أو الشتا، القهوة أو الشاى.. لحد كده تمام وهوپ يظهر الشاى بلبن ويطلع له توجّه وقاعدة عريضة بتحبه وهو لغز بالنسبة ليّا.
شوية مُشاهَدات سريعة:
محبو الشاى بلبن بيتكلموا عنه أكنُّه ابن خالتهم أو فرد من العيلة، فتظهر تعليقات زى: الشاى بلبن مشروب طيب وبيطبطب عليك.. ده على أساس أن القهوة أو الشاى بيصبّحونا بعلقة ويمسّونا بعلقة؟
واللى يقولك الشاى بلبن ده مشروب واضح.. واضح فى إيه متأخذونيش؟ يعنى واضح فى كلامه ولا مواقفه ولا إيه؟!
وآخرون يجزمون أن الشاى بلبن مشروب بسيط، بسيط إيه هو إحنا بنتكلم على مَج هنشربه ولّا امتحان وصفية ولّا هندسة فراغية؟!
وفى اتجاه آخر رأيه العكس وهو أن الشاى بلبن مشروب معقد وله تكنيك ومش شوية شاى ومية ولبن وأقلب.. لا الموضوع كبير ومدروس مش جهجهونى كده.
فى شاى بلبن اللبن بتاعه أكتر من الشاى، وفيه الشاى واللبن بيبقوا قد بعض، وفى شاى بحليب منه فيه، وفى شاى كرك. وترتيب المكونات فى عمايل الشاى بلبن مهم وبيدّى طعم مختلف. الشاى والسكر والمية واللبن ولّا اللبن وبعده الشاى وبعد كده المية والسكر؟ ده طعم وده طعم، وهل معمول بشاى خرز ولا پاكيت، وهل على نار عالية وشيلته قبل ما يفور ولّا مسخن المية فى الكاتيل. الخلاصة الشاى بلبن مشروب بسيط أمْ معقد طلع موضوع خلافى.
نيجى بقى للقاضية بالنسبة ليّا: الشاى بلبن مشروب متواضع ومبيحبش الشهرة.. نعم؟ آه والله زى ما بقولكم كده.
وده علشان هو مشروب ملوش محلات مخصوص وملوش مكنة معينة بتعمله غير الحوارات بتاعة لاتيه وكاپتشبنو وقهوة تركى وقهوة أمريكانى وفرنساوى وغير الشاى اللى منه أنواع كتير أشى أخضر وآيرل جرى وشاى الفطار الإنجليزى والشاى بالنكهات، من الآخر الشاى بلبن متواضع ومفيهوش فزلكة ومش بتاع أضواء وفى حاله.
مروى واحدة صاحبتى قوى وهى مدمنة شاى بلبن ومديّاله وضع أكبر من حجمه، بتسافر واخدة شاييها ولبنها معاها. ليه يا مروى هو أنت طالعة روسيا؟ احنا رايحين الجونة يا حبيبتى!.
أو مثلاً تكون بتشرب شاى بلبن فابنها ييجى يكلمها: تبصّله كده نظرة فيها حنية الأم بس قالبة على حلّ عَنّى وتقوله: محسن أنا بشرب الشاى بلبن دلوقتى من فضلك سيبنى.. أنت بتشربيه من ودانك ولا إيه؟!
والشىء الذى لا أفهمه أنها بتشربه فى كل المناسبات: زعلانة، زهقانة، جعانة، مضغوطة، فرحانة، عايزة تنام أو مش عارفة تنام!!.
الصراحة حاسّة إن الشاى بلبن طلع حاجة مهمة وأنا كنت مهمّشاه وبعتذر له وأقوله اللى ما يعرفك يجهلك.. والحمد لله على نعمة إنى من محبى القهوة.
