لبنى مصطفى.. موهبة فى تحدى المرض!

فى كل مَرّة وفى كل مَقال هنتكلم فيها مع بعض عن لحظة سعادة، ممكن تكون اللحظة دى فيها سعادة لكل إللى حواليك، وتكون لحظة حزن ليك أنت شخصيّا، والعكس كمان ممكن يحصل، تكون لحظة سعادة ليك وتكون لحظة حُزن لكل إللى حواليك.. لحظات سعادة كتير هنتكلم عنها بتحصل لناس كتير، سواء لحظة سعادة بالنصر أو لحظة سعادة بوظيفة كان صعب قوى تتحقق، لحظة سعادة بمنصب مستحيل أو لحظة سعادة للشفاء من مرض صعب جدّا الشفاء منه.

يعنى ممكن تبدأ الكلام بكلمة لحظة لو سمحت أو لحظة من فضلك وفى لحظات كتير بتعدى على البنى آدم بيكون فيها فى منتهى السعادة أو فى منتهى الخوف فى لحظات السعادة بيحس البنى آدم إنها خلصت بسرعة أما فى لحظات الخوف بيحس إنها لحظات تقيلة وصعبة مش عايزة تمر وممكن تكون كانت فعليا وعلى الساعة لحظات متخطتش الثوانى المعدودة وده اللى حصل مع بطلة قصتنا النهارده أو بطلة مقالتنا اللى مامتها بتقول هى لحظة أخدنا فيها القرار من أن لبنى كفاية كده تعليم (وهتعرفوا لبنى وصلت إلى إيه) ونركز بقى فى.. تعالوا نسمع من مامتها هتحكى إيه عن لبنى وهى هتبدأ معاكم على طول فى المقالة.

وبتبدأ كلامها مامت لبنى وتقول: 

لبنى مصطفى محمود بطلة العالم والعرب والشرق الأوسط وشمال أفريقيا للسباحة.. اتولدت داون سندروم.. رغم أن كل الدكاترة قالوا إن مفيش أى أمل أن ممكن تكون حاجة يعنى كدا أو لها شأن أو كيان أو إنسان عادى يعنى بس الحمد لله بالأمل والاطلاع والإصرار والصبر وصلت لبنى إنها تكون بطلة عالمية ودولية وأفريقية وعربية.. وحصلت على ما يقرب من 200 ميدالية منها 19 ميدالية عالمية ودولية والباقى محلى جمهورية وكأس مصر.. لبنى حاليا عندها 27 سنة.. اتعلمت فى مدارس مصر للغات وخلصت دبلوم مهنى.. اتعلمت الرياضة عن  طريق يعنى الداون سندروم بيبقوا تعبانين ويجلهم التهاب رئوى كدا بس الحمد لله فى أثناء فترة العلاج اكتشفنا أنها حابة السباحة وكدا.. فبدأنا نعرف أن فيه بطولات لذوى الهمم فاهتمنا يعنى الحمدلله مش هنمشى فى التعليم لو مش هنوصل اللى إحنا عاوزينه فى التعليم فممكن نقدر نعوض دوت فى حاجة تانية.. فقلنا إيه المشكلة تبقى بطلة رياضية بطلة عالم اللى إحنا شفناهم دول والحمد لله بدأنا نسأل وعرفنا أن فيه متخصصين لتدريبها.. اتدربت وهى عندها 3 سنين.. دخلت بطولات وهى عندها 6 سنين يعنى كانت بطولات هنا محلية والحمد لله من أول بطولة لها سنة 2000 جابت ميداليتين دهب الجمهورية وكأس مصر، بعد كدا بدأنا نعرف أن فيه بطولات عالم وبطولات دولية.. دخلت وهى عندها 8 سنين بطولة جمهورية هنا تبع الأولمبيات وكسبت برضه ميداليتين دهب.. وعندها بدأت لبنى سنة 2000 ولحد دلوقتى بطلة جمهورية وكأس مصر.. يعنى 2000 لـ 2021 جمهورية وكأس مصر على طول بتكسب المركز الأول فى البطولات كلها اللى بتدخلها الحمد لله.. لبنى مثلت مصر فى بطولات دولية أول تمثيل دولى لها كانت فى سنة 2006 كان البطولة الإقليمية فى دبى ودى كانت بطولة لها إقليمية دولية يعنى جابت فيها 3 ميداليات دهب والحمد لله بعديها برضه اتأهلت لبطولة العالم فى شنغهاى سنة 2007 جابت دهب وفضة وبرونز وفى البطولة دى تحديدًا يعنى فاكرها كويس جدا إنها اتأهلت اتصعدت لسن أكبر رحت لمرحلة عمومى مع أن سنها 14 سنة بس اتصعدت لمرحلة عمومى وكسبت الحمد لله وكانت أول بنت فى البعثة المصرية تجيب ميدالية أول حد فى الفرق وفى الفردى تجيب ميدالية هى اللى بدأت الميداليات واتكتب عنها أنها عروس البحر الأبيض المتوسط.. السمكة الذهبية بمناسبة إنها جابت أول ميدالية وكدا وخاصة السباحة.. سنة 2008 برضه لبنى اتأهلت ومثلت مصر فى أبوظبى البطولة الإقليمية فى أبو ظبى جابت فيها 4 ميداليات دهب وبعد كدا سنة 2010 مثلت مصر فى البطولة الإقليمية فى سوريا جابت ميداليتين دهب وواحدة فضة وبعد كدا مثلت مصر سنة 2014 فى البطولة العربية التى أقيمت فى مصر وافتتحها الرئيس عبد الفتاح السيسي، لبنى جابت فيها ميداليتين دهب فى الإيفنت الفردى وجابت ميدالية فضة فى التتابع.. سنة 2016 بدأنا مع الاتحاد المصرى للإعاقات الذهنية.. بدأ يعمل اتحاد يبقى فيه بقى بطولات عالم لنا بالأرقام زى الأسوياء.. لبنى الحمد لله جابت الأرقام المؤهلة وكانت فى المنتخب وسافرت إيطاليا.. البطولة دى أقيمت فى فلورنس بإيطاليا.. الحمد لله لبنى جابت ترتيبات عالمية حلوة وأخدت ميدالية برونز فى التصنيف بتاعها وسنة 2017 مثلت مصر فى البطولة العالمية فى المكسيك جايبة ترتيب خامس وكانت البنت الوحيدة داون سندروم اللى اتأهلت وجايبة الأرقام برضه لبنى مثلت مصر تبع الاتحاد المصرى للإعاقات الذهنية فى بطولة العالم فى أستراليا، والبطولة دى أكتر بطولة قريبة لقلبى لأن لبنى كانت قريبة للمركز التالت إنها تجيب ميدالية برونز يعنى الفرق بينها وبين المركز التالت وكانت خلاص هتجيبها بس حاجة بسيطة الحمد لله وجابت ترتيب رابع على مستوى العالم واتسجل ريكورد باسمها يعنى لبنى لها ريكورد عالمى فى الكذا بطولة اللى طلعتها دى لأنها كانت بتدخل فى التصفيات النهائية.. لبنى الحمد لله بتعمل أشغال يدوية عمالى كوشن وحاجات هنا فى البيت حلوة أوى وبتلون وبترسم رسومات بسيطة.. لبنى دخلت معهد الباليه سنتين وكانت برضه لبنى البنت الوحيدة فى مصر من فئة الداون سندروم .. البنت الوحيدة عمومًا فى كل الأوقات اللى غنت قدام الرئيس عبدالفتاح السيسى ورؤساء العالم فى افتتاح قناة السويس الجديدة وبرضه لبنى فى قادرون باختلاف 1 و2 عملت عرض أزياء قدام الرئيس السيسى والحمد لله برضو حاليا بتدرس علشان نفسها تدخل جامعة فبتدرس فى محو الأمية. وبرضو هى بتهوى الفنون الاستعراضية.. عملت عروض كتير أوى الحمد لله.. حلم حياتها أنها تبقى موديل فاشون فاشونيستا كدا. فنفسها حد يكشفها فى المجال ده وحد يقتنع بالمواهب بتاعتها إنها تبقى فاشونيستا أد الدنيا كدا ويبقى ده الكارير بتاعها فده حلم أنها توصله وإن شاء الله بإذن الله هنوصله وبرضو نفسها تمثل نفسها تبقى ممثلة كدا فى أدوار برضو حلوة وجميلة فالحمد لله إن شاء الله بإذن الله يقدرها إنها ممكن تحقق أحلامها دى وتحقق كل طموحاتها وتحقق حلمها فى الاستمرارية فى السباحة إنها توصل لأولمبيات فرنسا بإذن الله يارب العالمين وتمثل مصر وتعمل حاجة مشرفة.. دا كل التاريخ بتاع لبنى. 

وهنا بقى أنا أقول لماما لبنى إيه الجمال والعظمة دى أحسنتم وبإذن الله لبنى تحقق كل أمانيها وتدخل موسعة للأرقام العالمية بأرقمها المشرفة. 

ونهاركم سعيد ويومكم بيضحك وبقول للبنى نهارك سعيد ويومك بيضحك