اللانش بوكس
منى رضوان
السَّنة الدراسية ابتدت فى بعض المدارس، كل سَنة وأنتوا طيّبين.
فى هذا الوقت من العام تقدر تطّلع أى أمّ وأب بيوَصّلوا ولادهم المَدرسة بكل سهولة؛ خصوصًا بعد ما يقرب من سنة ونص كان كل التعليم فيها أون لاين من البيت.
تبص على وش الأهالى تلاقى الهالات السودة عاملة دواير وأشكال هندسية وعينيهم وجفونهم بتقفل لوحدها وبيبربشوا بربشة سريعة ونَفَسهم مش مضبوط وبيحاولوا يستنشقوا أكبر كمية من الأكسچين علشان يفوقوا.
أمّا بالنسبة للعيال فدول متكدرين جامد، ومعندهمش حماس السَّنة جديدة وفصل جديد وأنهم هيشوفوا أصحابهم، رايحين غصب واقتدار.
التعليم منظومة مهمة ومرهقة للأهل وللأولاد، منظومة محتاجة فلوس ومجهود كتير، أم وأب بأربع إيدين ورجْلين وحساب فى البنك وعربية وطبعًا دكتور نفسانى علشان يعالج الأم والأب ويدّيهم مضادات الاكتئاب من بدرى قبل مع حالهم يتدهور.
من الأيام المشهودة فى بداية العام الدراسى هو يوم الـ supply list، وفى اليوم ده عادة نسبة الطلاق بتزيد.
الـ supply list هى لستة حاجات مطلوبة كل مَدرسة بتحددها ولازم كل طالب يجيبها، فيها مثلا: ألوان مَيّة وزيت وجواش وخشب وفلوماستر وشمع. كشاكيل كل الأحجام والأشكال والمقاسات ومنها ما هو كاروهات ومسطر وسطر وسطر وورقه تقيل للرسم.
أقلام من كل الدرجات، B و HB و 2HB، اللى بيتبرى أو بسنون وكل قلم تجيب منه 4 ولّا 5.
أساتيك وبرّايات ومناقل وبراجل ومساطر ولزق وصمغ وأخيرًا وليس آخرًا شوية حبشتكنات التعليم الأنترناشيونال زى مريلة للألوان وديتول wipe وورق مقوّى للأنشطة داخل الفصل وسبورة صغيرة بأقلام فلوماستر بتتمسح.
كل ما سبق مع العلم أن حاجات كتير online بيشتغل فيها الولاد على التابلت المَدرسى.
نيجى بقى لفقرة اللانش بوكس lunch box وخدوا بالكوا أن الـ lunch box حاجة و الـ lunch bag حاجة تانية، واحدة علبة منها المتقسم ومنها اللى مش متقسم، إنما الـ bag دى الشنطة اللى بتحط فيها الـ box وجوّاها إزازة المَيّة الستانلس لزوم الهيلثى لايف.
الأمّ بتبقى على شَفَى الإغماء وهى واقفة ساعة على كعوب رجليها تقلى وتقطع وتستّف وتلف وترتّب وتغلف الأكل اللى هيتحط فى اللانش بوكس اللى هتتحط فى اللانش باج. روتين يومى سخيف ومُمل طول أيام السّنة ماعدا العطلات الأسبوعية والإجازات الرسمية.
ننتقل بعد كده للفقرة المسائية فى اليوم الدراسى واللى فيها الهوم ورك والتمارين والدروس، وبعد كده العيال تتعشّى وتستحمّى وتنام، ويتكرّر كل ما سبق تانى يوم بحذافيره.
قلبى مع الأهل لأنهم عادة هُمَّ اللى بيلبسوا فى الحيطة، اصمدوا واعتبره جهاد من نوع جديد، جهاد مودرن متناسب مع تحديات العصر.
وأنتم يا أشبال المستقبل شدّوا حيلكم، الدنيا أكبر مَدرسة وأسهل مَراحلها هى المَدرسة اللى بفصول ومُدرّسين وحيطان.
