الرئيس و7 سنوات من الدعم لـ(القادرون)

فى كل مَرّة وفى كل مَقال هنتكلم فيها مع بعض عن لحظة سعادة، ممكن تكون اللحظة دى فيها سعادة لكل إللى حواليك، وتكون لحظة حزن ليك أنت شخصيّا، والعكس كمان ممكن يحصل، تكون لحظة سعادة ليك وتكون لحظة حُزن لكل إللى حواليك.. لحظات سعادة كتير هنتكلم عنها بتحصل لناس كتير، سواء لحظة سعادة بالنصر أو لحظة سعادة بوظيفة كان صعب قوى تتحقق، لحظة سعادة بمنصب مستحيل أو لحظة سعادة للشفاء من مرض صعب جدّا الشفاء منه.

 

اسمحوا لى إن مقال النهارده يكون عن الرئيس الإنسان اللى فى 2018 أعلن وقال إن العام ده هو عام ذوى القدرات الخاصة واسمحولى كمان إنى أستعرض معاكم بعض كلمات الرئيس عبدالفتاح السيسى فى المناسبات المختلفة وهو بيتكلم عنهم.

وهبدأ بحفل «القادرون باختلاف» فى عام 2018 اللى سيادة الرئيس طلع فى نهاية الحفل وحواليه أكتر من 25 ولد وبنت من أولادنا ذوى القدرات الخاصة.

وذكر سيادة الرئيس بالنسب أن فى مصر حوالى 10 ملايين بيت فيه حد من أولادنا لأن تقريبا نسبة المعاقين فى مصر (كل الإعاقات حوالى 10 ٪)، وقال سيادة الريس كمان: كنت بسأل نفسى فى 2011 و2012 و2013 و2014.

والأيام الصعبة اللى مرت كنت بقول: هى بتمر ليه.

بجهدنا إحنا بس ولا العمل اللى إحنا بنعمله بس أخلصنا إحنا بس لو كان فيه إخلاص ولا فيه حاجة تانية.

الحاجة التانية دى هى اللى إحنا فيه ده وبأكدلكم إنها علشان خاطر الولاد دى ولاجل خاطر أهلهم اللى هما بيجروا عليهم وبيرعوهم ليل ونهار وعلى مدار الأسبوع والشهر والسنة بيجروا عليهم وبيتمنوا لهم كل خير بيجروا عليهم وهما بيتمنالهم الحياة وربنا سبحانه وتعالى كان لا بد يحمى البلد دى ويحافظ عليها من كل شر وسواء لجل خواطر كتير والخاطر ده منهم.

الخاطر ده اللى كان يقصده الريس هما الولاد اللى كانوا حوالين سيادة الرئيس وهو بيقول كلمته الولاد كانوا بيبصوا للرئيس مش علشان هو الرئيس لا علشان هو الأب والسند ليهم من فضلكم بصوا للصورة وشوفوا نظرة رحمة خالد ورحمة ممدوح لسيادة الرئيس عاملة إزاى الولاد اللى حوالين سيادة الرئيس مبيعرفوش ينافقوا مبيعرفوش غير الأحاسيس الصادقة ومعندهمش خداع ولا تملق عندهم بس الحب اللى بيظهر وبيزيد وبيفيض لما بس يحسوا أن اللى قدامهم بيحبهم من قلبه مش بيعطف عليهم بس.

ومن كلمات الرئيس أيضًا إنه قال إنه من دواعى الفخر والاعتزاز أن نرى أبناءنا وبناتنا من ذوى القدرات الخاصة يحققون النتائج غير المسبوقة فى مختلف المجالات.

فى المجالات الرياضية وخاصة فى رفع الأثقال تفوز مصر بميداليات ذهبية فى البطولات الأفريقية والباراوليمبية للاعبات ولاعبين ذوى قدرات خاصة وخاصة جدا وفى مجال الإعلام وفى القنوات المصرية وخاصة قناة «دى. إم. سى» تظهر لنا المذيعة الكفيفة رضوى حسن وبعدها تظهر المذيعة رحمة خالد المصابة بمتلازمة داون ودائما يظهر أمامى سؤال: هل كانت سوف تتاح هذه الفرصة لهم قبل إعلان الرئيس السيسى دعمه لهم وأيضًا تكريم الموهبتين الرائعتين فى الغناء مريم النجدى وهديل ماجد المكفوفتين وهديل ضعيفة النظر طلبت من سيادة الرئيس تغنى ويسمع صوتها وغنت ولما جت تنزل من على المسرح توجه لها السيد الرئيس علشان ياخد بايدها وينزلها وهديل لما الريس كلمها سألته هو أنت الريس بجد مش مصدقة إنه قام من مكانه علشان ينزلها.

سيادة الرئيس الإنسان شكرًا من القلب من كل أم وكل أب عنده ملاك فى بيته من أصحاب الهمم. إننى دائمًا أسمع دعاءهم لك بالصحة والستر ومن أحلى الكلمات التى تقال عنك سيدى الرئيس إنك جابر الخواطر ربنا يجبر بخاطرك ويعينك ويقويك وتكون دائمًا أبدًا لنا ولهم السند والضهر واسمحوا لى أن أنهى هذه المقالة بكلمة: سيادة الرئيس.. نهارك سعيد ويومك بيضحك.