رد الجميل.. أصحاب الفضل العظيم

النهاردة 26 رمضان وزى ما قولتلكم قبل كده رمضان بيجى فجأة وبيخلص فجأة وكنت بفكر طول الأسبوع اللى فات أكتب عن مين علشان أرد له الجميل وكل شوية بروح وأفكارى وأرجع لأن هل يكون عندى فرصة إنى أرد الجميل للناس اللى ساعدونى فى حياتى من غير ما أفتكر أرد الجميل لأبويا وأمى الله يرحمهم وإلى مراتى ربنا يديها الصحة والعافية وطبعًا مهما حاولت أتكلم وأحكى وأقول الجمايل اللى قدموها ليا علشان أبقى شخص ناجح مش هيكفينى صفحتين ولا هيكفينى المجلة كلها بس أنا اختارت حاجات معينة أنى أشرككم معايا فيها حاجات ليها علاقة بالحياة وبالتعامل بين البشر وهبدأ أول حاجة بأمي اللى وأنا صغير كانت بتقنعنى أنى أصوم لحد الساعة 12، ولما كبرت شوية وكنت أنسى وأشرب كانت تقوللى كمل صيامك ده ربنا هو اللى شربك.  ولما كنت أقولها  وأنا بتمضمض علشان أصلى بحس أن فيه مية فى بقى أعمل إيه تقولى متعملش حاجة هى هتنشف لوحدها بس لو حسيت أنك عايز تبلع ريقك ابلعه.

 

حببتنى فى الصيام عمرى ماكنت حاسس أنه حاجة صعبة ولما بقى عندى 10سنين بقيت أصوم عادى خالص. ومر بيا وبيها الزمن وكانت بتتعب من الصيام علشان السكر وكنت أقول لها صومى لحد الساعة 12 وبعدين افطرى ربنا حاسس بيكى. وكنت أقولها خدى الدوا وكملى فطارك عادى وكنتى بتصدقينى زى ما كنت أنا بصدقك بس اتعلمت أصوم لأنك كنتى دايما معلمانى أن الدين يسر مش عسر وكل ما بييجى رمضان بفتكر الموضوع ده وبحكيه لولادى اللى الحمدلله كلهم اتعلموا يصوموا من صغرهم وأحب أرد الجميل إلى أبويا اللى علمنى أهمية القرش بحاجة بسيطة جدًا والحاجة دى لما كبرت ودخلت معهد السينما أن ده كان أول  أول قرار إنتاجي اتعلمته فى حياتى وأبويا علمهولى  وأنا فى خمسة ابتدائى كان فيه رحلة وكنت عايز أطلعها مع المدرسة وقبلها بكام يوم كنت شارى كراسة رسم وألوان علشان عايز أرسم وبعدين قررت لا مش هرسم أنا مبحبش الرسم أصلا  فا أبويا حب يعلمنى درس فى الحفاظ على الفلوس. قالى لو عايز تروح الرحلة روح على حسابك قلتله أروح على حسابى إزاى  معاييش فلوس قالى حدفعلك أنا وهخصم من مصروفك كل شهر. روحت الرحلة واستمتعت وعرفت أصرف على نفسى من فلوسى المخصوم منها كل شهر جزء علشان أسدد الرحلة وفضلت أسدد فى الرحلة لمدة 8 شهور بيتخصو كل شهر من مصروفى فعلا وبعد ما سددت كل الفلوس جه أبويا وإدانى فلوس الرحلة كلها وقالى أنا كنت عايزك تحس بأهمية القرش اللى فى إيدك وتعرف تحافظ عليه وتظبط نفسك على اللى معاك وأنت عملت كده وقولتلم يعنى لو فى حاجة تانية ممكن تسلفنى تانى قالى جملة عظيمة قالى «من خد وإدى صار المال ماله».

الله يرحمكم أبى وأمى علمتونى كتير وآخر حاجة بقى هكلمكم على مراتى اللى ربنا بعتهالى علشان تريح قلبى وتسعده عارفين أغنية أيمن بهجت قمر بتاعة لقيت الطبطبة أنا لقيت الطبطبة من حوالى 32 سنة وهى على طول بتطبطب عليا وأنا زى أى راجل فى الدنيا الشغل بالنسبة ليه محور حياته وطبعا فى شغلانتنا بالذات ممكن كتير مبيجلناش شغل بس بلاقى طبطبة رهيبة عمرها ما طلبت حاجة وهى عارفة أن مفيش فلوس وعمرها ما حاسستنى أن مفيش فلوس ومش بس كده أول ما بتحس بهمى بتقعد جانبى وتغنيلى وتقولي (متشيلش فى بالك تحلالك عيشتك وتروق أرزاق لخلق على الخالق مش على المخلوق) بابتسامتها وصوتها الجميل أنسى كل هموم الدنيا وطول عمرها شايلة البيت ولمة العيلة، وتقريبًا بتكلم أختى كل يوم زى ما كانت أمى بتعمل حاجات كتير على هاما مراتى لو فضلت أكتبها مش هخلصها بس الحاجة الأهم اللى عايز أقولها أن أبويا وأمى ومراتى ليهم عندى جمايل كتير أوى ومهما كتبت أو حاولت أشرحلكم مش هعرف بس فعلا عايز أفضفض علشان أرد جزء من جميلهم عليا ومن العدد اللى جاى بإذن الله هنبدأ تانى فى سلسلة نهارك سعيد ويومك بيضحك ونتكلم تانى على أبطالنا من ذوى القدرات الخاصة واسمحولى أنهى المقالة دى بنهاركم سعيد ويومكم بيضحك.