عجبًا لغزال
منى رضوان
النهارده هنتكلم عن أغنية لها مكانة خاصة فى قلوب المصريين وهى «عجبًا لغزال» للفنان الراحل عمر فتحى.
الأغنية دى مش بس لحنها جميل وصوت عمر فتحى فيها كان سابق عصره، هى كمان فيها سر خلاها تدخل كل بيت مصرى والناس كلها تحفظها وترددها رغم إنها مكتوبة باللغة العربية الفصحى.
طبعًا لما بنسمع كلمة فصحى فى الأغانى بييجى فى بالنا إن الأغنية هيبقى كلامها مكلكع وصعب يتفهم أو يتحفظ بسهولة خصوصًا لما نقارنها بالأغانى العامية الدارجة، وده كان تحدى كبير وقتها وهو إنك تقدم أغنية بالفصحى للشباب والجمهور العادى وتخليهم يحبوها ويتفاعلوا معاها.
وهنا تأتى عبقرية أغنية «عجبًا لغزال» اللّي كتبها ولحنها الفنان فؤاد عبد المجيد واللّي قدرت بمنتهى البساطة تكسر حاجز العربية الفصحى بأنها استخدمت جمل سهلة وألفاظ واضحة ومفهومة للكل. يعنى مثلًا لما نسمع عجبًا لغزال قتّال عجبًا كم بالأفكار وبقلوب لعبا الكلام، هنا فصحى لكنه مش معقد وكلمة غزال كلنا عارفينها وبنستخدمها حتى فى كلامنا العادى ككناية عن الجمال وقتّال هنا بتوصف تأثير الغزال ولعبا بالأفكار والقلوب صورة شعرية جميلة بس مباشرة وسهلة.
الجمل الغنائية فى الأغنية كلها مفيهاش تعقيدات لغوية ولا كلمات محتاجة قاموس لفك طلاسمها. وجملة يخطو بدلال فيثير الشهبا برضه واضحة وبتوصف مشية الغزال بمنتهى الرقة والجمال. السر كله كان فى اختيار المفردات اللى رغم فصاحتها قريبة من الوجدان ومستأنسة متخضش الناس.
أما اللحن فهو خفيف ومبهج وراقص وكانت الأغنية دى عادة بترقص عليها فرقة رضا، لحن بيخليك عايز تتحرك معاه. ده غير صوت عمر فتحى نفسه اللّي فيه حيوية وشباب وقدر يوصل إحساس الأغنية بمنتهى التلقائية.
ولكل ما سبق المصريين حبّوا الأغنية وحفظوها لأنها كسرت الصورة النمطية عن الأغانى الفصحى اللّي ممكن تكون تقيلة أو رسمية.
عجبًا لغزال أثبتت أن الفصحى ممكن تكون لغة غناء شعبى وشبابى والناس لقت فيها الكلمة الفصيحة مع سهولة اللحن والأداء فدخلت قلوبهم بسرعة وبقت أغنية الأفراح والمناسبات السعيدة وكل جيل بيسلمها للجيل اللى بعده. والدليل على كده إننا لغاية النهاردة لما بنسمعها بنلاقى نفسنا بندندن معاها وبنبتسم.
أغنية عجبًا لغزال قتّال عجبًا مش مجرد أغنية بل هى علامة فارقة فى تاريخ الأغنية الشبابية المصرية وقدرت تقدم نموذجًا لأغنية فصحى ناجحة جماهيريًا فيها عمر فتحى الله يرحمه ساب بصمة بصوته واختياراته.
وفى الآخر نقدر نقول إن عجبًا لغزال هى الدليل القاطع على أن اللغة العربية الفصحى ممكن تكون جميلة وسهلة ومحبوبة لما تتقدم بالشكل الصح. الأغنية دى بتفكرنا دايمًا إن الإبداع ملوش حدود وإن البساطة ممكن تكون أقوى سلاح للوصول لقلوب الناس. فيا لعجب هذا الغزال الذى ما زال يلعب بأفكارنا وقلوبنا لعبًا حتى الآن!
