جوزك على ما تعوديه.. حسن الاختيار
رغدة أبورجب
فى حاجات مهمة جدا عند اختيار شريك الحياة لازم تعرفوها كويس أهمها إن مفيش حد بيتغير وإن الشخص اللى حترتبط بيه طباعه مش هتتغير نهائى بعد الجواز، فى تفاصيل مش جوهرية فى الشخصيه ممكن يتم تعديلها لكن غير كده مفيش، وده أكبر مقلب وقعت فيه البنات.
تانى أهم حاجة متحولش تاخد الشخص ده وتقول أنا هاغيره لأن أنت حبيته وقررت ترتبط بيه وهو كده فا متحولش إنك تغيره علشان يكون شبهك.
العلاقة الزوجية مش علاقة عابرة أو خطوبة، دى علاقة أبدية فلازم عند اختيارك للشخص ده تتأكد إنك حتعرف تتأقلم معاه ومع طباعه، وأهم من ده تعرف تتعايش مع أسرته وعيلته لأنهم حيبقوا جزء من عيلتك وكلام أصل أنا مليش دعوة بعيلته وهو اللى يهمنى الكلام ده مش مظبوط نهائى، ده جواز مش لعب عيال مفيش حد فينا كامل ولا حد من غير عيوب كلنا فينا عيوب إحنا مش ملايكة الفكرة أن أعرف إذا كنت حقدر استحمل عيوب الشخص التانى ولا هى عيوب صاعبة عليا أنى استحملها.
بس يا جماعة إدوا نفسكم فرصة تدرسوا الشخصية وتتعرفوا عليها وتتعرفوا على تفاصيلها علشان الاختيار يكون صح ومظبوط.
الجواز حلو وجميل مع الشخص المظبوط وصعب جدا ولا يطاق مع الشخص الغلط، بس أهم حاجة نختار صح وبلاش كلام بحبه وهتجوزه حتى لو إيه لأنك أول واحدة بتدفعى تمن الكلام ده وطبعا كلامى هنا للبنات لأنها هى الطرف الأكثر تضرراً.
