نجوم ملاعب يعيشون على الصدقة

 نجوم لمعت كثيرا فى الملاعب المصرية وأسعدت الملايين، وحصدت البطولات سواء على المستوى المحلى للأندية التى كانوا يلعبون لها أو على المستوى الدولى مع منتخب مصر. بل والأكثر دهشة فيهم من حصل على كأس العالم العسكرى عام 1993.. ولكن ذلك عندما كانت كرة القدم لا تدر العائد المادى الموجود الآن من حصول أنصاف لاعبين على الملايين، والنجوم القدامى يتسولون لقمة العيش أو العلاج، ولو ذكرنا أسماء هؤلاء النجوم فى عالم الساحرة المستديرة لصدم الجماهير من هذه المهزلة. .  ومن الجحود الآن من أبنائهم من  نجوم هذا العصر، ونحن هنا نتساءل: أين أبناء هذا الجيل والجيل السابق من الأساتذة الكبار فى عالم الكرة؟.
 
لذلك سألنا الكابتن محمود أبو رجيلة أمين صندوق جمعية اللاعبين القدامى: هل يوجد من يتبرع للجمعية وعدد الأسر ومن هم هؤلاء النجوم الذين يتم صرف  المعاش الشهرى لهم .
 فى البداية أكد أبورجيلة أن الجمعية تتكون من (14) لاعبا من أجيال مختلفة منهم الكابتن عبدالمنعم الحاج رئيس الجمعية وأبو رجيلة أمين الصندوق ومعه أحمد شوبير والأعضاء منهم ربيع ياسين.
 وأكد أبو رجيلة أننا جمعية تعيش على التبرعات سواء من نجوم الكرة أو الأشخاص، ولكنى أجد جحودا من بعض النجوم حتى أننى أصبحت أتسول منهم فلوس أموال التبرع، وفى معظم الأحيان يتهربون منى حتى أن بعض النجوم عملولى (بلوك)، وعندما أتصل به أجده دائما مرفوعاً من الخدمة والباقى عندما يرانى فى الشارع أو أى مكان يعمل مش واخد باله منى ويهرب سريعا خايف آخد منه فلوس برغم أن الفلوس دى رايحة فى الخير وعلى زملائه من اللاعبين القدامى أو لأصحاب الحالات الحرجة من اللاعبين فى أندية مغمورة.
 وأقسم بالله أنا هاين عليا أبوس رجل الناس علشان يتبرعوا لزملائهم.
 أنا قلت لهم مرة لو كل واحد اتبرع بـ100 جنيه فى الشهر مش عاوزين أكثر من كده لكن فين القلب اللى يسمع والضمير اللى يحس؟!
 وعن عدد الأسر التى ترعاها الجمعية قال: هى الآن 93 أسرة لكن من أول الشهر هتكون (100) إن شاء الله. وبنصرف لكل لاعب (300) جنيه فى الشهر علشان معاش نقابة المهن الرياضية للناس دى 40 جنيها فى الشهر يتم خصم 2 جنيه يكون الصافى 38 فقط فى الشهر هو ده معاش ولا تقدير للناس؟!
 وأكد: لو تعرف أسماء هؤلاء النجوم هتجيلك صدمة دول أسماء تخوف فى عالم الكرة وأصحاب صولات وجولات.
منهم (فاروق السيد (الزمالك)، خورشيد (المحلة) وعمر عبدالله (المحلة) ومدحت فقوسة (المصرى)، البحر جسور (الاتحاد)، عادل زين (القناة) عبده سليم (اتحاد السويس) شمس الإسكندرانى (الاتحاد)، زقلة (الاتحاد)، والبورى (الأوليمبي)، الإسناوى (المحلة).
كل دول ولسه فى أسماء كثيرة غيرهم.
 وعن الأسماء التى تتبرع للجمعية قال هناك من 14 إلى 20 شخصاً فقط من يتبرع بنظام لنا منهم أحمد شوبير يتبرع كل سنة بـ (35) ألف جنيه ولما طلبنا تكريم بعض هذه الأسماء وغيرها تبرع لحفل التكريم تانى بمبلغ 20 ألف جنيه والنجم محمود الخطيب يرسل لنا كل سنة شيكاً بمبلغ 35 ألف جنيه والكابتن (زيزو) يرسل كل شهر مبلغ 5000 جنيه. ووليد سليمان نجم الأهلى الحالى (2000) شهريا و(10000) من أجل الحفل والجميل أن وليد بييجى بنفسه ليا علشان يدينى فلوس وأنور سلامة (1000) شهريا.
وعلى أبو جريشة وعصمت قايلون نجم الإسماعيلى السابق وهما فى وادى جلة دلوقتى بيرسلوا (2000) شهريا.
وكمان الكابتن مختار مختار اللى كل ما اتصل بيه يقول لى ابعت السواق أنا فى الجامع ويدفع فلوس فى الجامع عشان ربنا يكون شاهد علينا وهيثم فاروق بيبعت من قطر  بعت (20) ألفاً مرة و(30) ألفاً مرة ثانية.
 وعلى خليل نجم الزمالك فى الجيل الذهبى عمل جمعية مع المدربين المصريين هناك ويرسل دائما لينا فلوس وسيد عبدالحفيظ مدير الكرة فى الأهلي. دفع (35) ألف جنيه وطارق العشرى طول ما هو فى مصر بيبعت فلوس.
 وهناك أسماء لم تستمر فى التبرع زى أحمد حسن كان وهو مدرب السنة إللى فاتت بيبعت ربع مرتبه لينا ولكن بطل يدفع حاجة بعد ما ساب التدريب.
وفى قصة كانت جميلة، أحمد ناجى مدرب حراس المنتخب طلبنى مرة وقال لى عاوز أشرب معاك الشاى وقعدنا مع بعض ولقيته بيدينى ظرف فيه (40) ألف جنيه وأنا قلت له دى أغلى كوباية شاى فى حياتي.
بس مش عارف المبلغ منه ولا من جهاز تدريب المنتخب وقال لى بعد ماتش غانا إن شاء الله نكسب. وفيه دفعة ثانية وأنا مستنى الدفعة التانية. وأطرف حاجة إن عصام الحضرى بعت ليا مرتين كل مرة مبلغ (2000) جنيه لكن بعد ما دخل فيه (4) أهداف فى ماتش الزمالك السنة اللى فاتت بطل يبعت.
وعن اتحاد الكرة قال إن هانى أبو ريدة قبل ما يكون رئيس الاتحاد كان دائم الاتصال والرد والتبرع، لكن بعد ما مسك محدش عارف يمسك منه حاجة وعلاء عبدالعزيز المدير الإدارى للاتحاد مش عاوز يوصلنى بيه أبدا مش عارف ليه برده.
 لكن حقيقى النادى الزمالك والأهلى دائما التبرع حتى إحنا جمعنا نفسنا  وروحنا إلى المستشار مرتضى منصور فى زيارة ولكن الراجل حقيقى إنسان جدا معنا وخصم من عقد كل لاعب مبلغ (5000) جنيه وتم التبرع بنصفها للجمعية والنصف الآخر لمستشفى 57 لمرضى سرطان الأطفال والحصيلة كانت 85 ألف جنيه. غير أنه دفع من جيبه مبلغ 25 ألف جنيه والراجل عامل معاش لكل نجوم الزمالك الكبار القدامى بمبلغ 4000 شهريا ومفيش شهر لم تصرف فيه هذه المبالغ وهذا المعاش تم بعد ما المستشار مرتضى مسك النادى قبل  كده مكانش فيه فلوس.
وكمان محمود طاهر رئيس النادى الأهلى دفع من عنده (30) ألف جنيه وتم عمل مزاد على (تى شيرت)  الأهلى بتوقيع النجوم عليه ولم مبلغ 20 ألف جنيه من الشركة الراعية، ومش عارف إزاى (تى شيرت) الأهلى بتوقيع النجوم « 20 ألف بس» غريبة.
 ومن رجال الأعمال هناك محمد مصيلحى رئيس نادى الاتحاد السابق دفع 20 ألفاً وكامل أبو على  30 ألفاً وجمال الجارحى 10 آلاف وأحمد فودة (10) آلاف وصفوان ثابت (40000) ألف جنيه ولو طلبنا تانى يدفع الراجل ده عمره ما أتأخر علينا.
 وفيه رجل أعمال يمنى عايش فى مصر مش عاوز حد يعرف اسمه دفع 20 ألف جنيه.. ونبيل عشماوى كل سنة بيدفع من 20 إلى 30 ألفاً دول اللى بيدفعوا لينا فلوس.
 لكن فى نجوم تانية ولا عمرى شفت وش حد منهم. يعنى الكابتن مجدى عبدالغنى اتصلت بيه أكثر من مرة وكل مرة يقول عينى وآخر مرة  قال لى الفلوس الموجودة عندنا للاعبين الموجودين وأعضاء الجمعية عندنا بس، حتى أنا قلت لنفسى لو اتبرع بمبلغ  من فلوس الحفل السنوى اللى بيصرف فيه أكثر من نصف مليون مش أحسن؟!
وهناك أسماء كثيرة منهم (ميدو) وحسن شحاتة وفاروق جعفر، ومدحت شلبي، وطه إسماعيل، وأيمن يونس دول ولا مرة حد بيرد عليا وحاولت الاتصال بطاهر أبو زيد مفيش أى محاولة نجحت حتى الآن.
 وأنا حاولت أتصل برجل الأعمال أحمد أبو هشيمة لما عرفت إنه ممكن يتبرع لكن فى لوبى حول الراجل محدش عاوز يخلينى أعرف أقابله أبداً، مش عارف ليه الناس مش عاوزة الخير وبتحارب أى عمل خير.
 وبعدين إحنا مش بندفع معاش بس إحنا عندنا حالات حرجة زى حالة 3 حكام من شهر إللى حصلهم حادث رحنا على طول إلى أسرهم وتم التبرع ليهم وبيتصرف لهم معاش وإسراء جمال لاعبة نادى الصيد فى المحلة اللى بلعت لسانها وتوفيت سافرنا المحلة وصرفنا لأهلها إعانة فورية.
 وعمر الأحمدى حارس المحلة إللى اتصاب فى حادث سير سافرنا ليه فى مستشفى المنصورة وصرفنا له إعانة من الجمعية. 