جوزك على ما تعوديه.. لما يقرر يبقى لطيف
رغدة أبورجب
ده لما بيكون الراجل مزاجه حلو وجميل وموده رايق فابيقرر إنه يعدى كل السخافات ويدلع الست اللى معاه.
دى لحظات حلوة أوى لازم تستغلها الست وتحسسه إنها فعلا مبسوطة بالمود ده، وإنها مقدرة كلامه الحلو وتصرفاته اللذيذة معاها.
وممكن تستغلها فرصة وتنبهه إن الطريقة دى أحلى وألذ كأسلوب حياة وأنه أفضل من القفش والعصبية على الحاجات الصغيرة اللى متستهلش.
إن الحياة تبقى سهلة بين الزوجين وأن كل واحد يكبر ويعدى وميقفش على التفاصيل البسيطة، ده ألطف. بمعنى تانى بلاش نتصيد الأخطاء لبعض، نكبر لبعض ونتجاوز لبعض ده أفضل كتير. مود الزوج اللذيذ ده ممكن يبقى من تصرف حلو عملته مراته أو من ترقية أو كلام لطيف من مديره أو أى حاجة لطيفة حصلت له، شغلت المود الحلو.
الست الناصحة مش بقى تشغل أسطوانة الندب وتقول له خير وتقعد تعمل إسقاط على روحه الحلوة وتخليه يكره نفسه ويكره المود اللطيف ده .
بالعكس تمامًا تشجعه على المود ده ولو تقدر تزوده ميضرش، الحياة السهلة اللطيفة دى حلوة وجميلة بلاش نعقد الدنيا ونكلكع المواضيع احنا مش فى حرب، دى علاقة حب وتفاهم.
