جوزك على ما تعوديه.. خناقات قبل الفطار

بيكون ليها طابع مختلف وغالبًا ما بتكون من الرجل نتيجة أن خُلقه ضيّق مع الشغل ويا سلام لو بيشرب سجاير وقهوة، فا ‏بينتج عن ده خناقة كبيرة ..

بتخلص فى حالة أن الزوجة تكبر دماغها ومتدخولش فى تفاصيل معه حتى لو إيه اللى حصل.‏

وعلى فكرة هو بيكون عارف إنه متعصب ومش قادر فا بيعتذر بعد الفطار.

فابيكون عندنا 30 خناقة قبل الفطار مقابل 30 معلش بعد الفطار. 

طيب إحنا محتاجين نأكد على أكتر من نقطة، أولها إننا كلنا صايمين وكلنا تعبانين وأغلبنا بيشتغل فا كلنا بنكون واصلين لنفس ‏المرحلة..

والنقطة التانية إن الستات بتكون صابورة جدًا بس ساعات كتيرة صبرها بينفد وساعتها ممكن تحصل مشكلة كبيرة نتيجة إنه ‏تَعبان وصايم ومش قادر يستحمل بدون سجاير وقهوة وهى صبرها نفد.‏

فا خلينا نتفق على اتفاق ضمنى إن أى حاجة قبل الفطار لا تحسب، وأى جدال مرفوض قبل الفطار.‏

ونتفق مع الزوجة تقول حاضر وتمام على أى اقتراح من قبل الزوج والموضوع ينتهى قبل الفطار وميتفتحش تانى بعد الفطار. ‏

وبكده ممكن تتفادى كتير من المشاكل اللى ممكن توصل للطلاق، نتيجة إن كله خُلقه ضيّق ومش مستحمل.

فانكبّر ونقول حاضر ونمنع النقاش قبل الفطارمع منع الأكل والشرب وبكده نوصل لنتيجة جيدة جدًا، علشان لسّه فاضل ‏شوية فى رمضان..

فانحب بعض علشان نكمّل اللى باقى على خير.