جوزك على ما تعوديه.. القمة فى الاستاد والخناق فى البيت
رغدة أبورجب
طبعًا قمة الأهلى والزمالك دى بتكون قمة كبيرة وماتش ومنافسة عالية جدًا بين الفريقين، والمفروض أنها رياضة جميلة ممكن تكون فرصة حلوة لأفراد الأسرة إنهم يتجمّعوا ويشوفوا الماتش، لكن طبعًا ده فى الأفلام العربى والمسلسلات.
الحقيقة؛ أن البيوت المصرية ممكن يقوم فيها خناقة كبيرة بين الزوج والزوجة أثناء الفرجة على الماتش، وخصوصًا لو الزوج أهلاوى والزوجة زمالكوية، أو حتى العكس.
تلاقى خناقة مع كل هجمة أو تشجيعة للفريق وطبعًا فى حالة إن الأهلى فاز على الزمالك بيكون يوم نكد على الزوج لأنها بتكون زعلانة على فريقها بَس مش بتكون زى الزوج اللى بياخد الموضوع على أعصابه، السِّت بردوا بيفوق معاها حاجات لكن تفاصيل مختلفة، عندها مذاكرة العيال وتوضيب البيت وتفاصيل تانية ممكن تزعل عليها بشكل أكبر.
وفى حالة إن الزمالك كسب تفضل الست تغيظ فى الراجل وتعبّر عن سعادتها، فا الراجل يقفش عليها ويحصل خناقة بردو.
الفكرة إن اختلاف الفِرَق الرياضية ده بيعمل مشكال كبيرة جدًا، فا الحل من وجهة نظرى إن كل واحد يتفرج على الماتش مع أهله أو أصحابه بعيد عن البيت وينسى أحزانه أو فرحته أول ما يدخل البيت.
أصل لو الكل احتفل ومهتمش بمشاعر التانى حتحصل مشكلة كبيرة، والرجالة مش بتهرج فى المواضيع دى وبتاخدها بشكل جادى جدًا، فا نصيحتى للستات كبّروا دماغكم واحتفلوا فى السر فى حالة فوز فريقكم وماشّوا الدنيا علشان ميطلعش عليكم بقية الأسبوع.
