جوزك على ما تعوديه.. كل وأنت ساكت

مش مقصود بيها مضايقة ولا حاجة الفكرة أننا كلنا صايمين زى ما اتفقنا فا طبعا ده بينعكس على الأكل بشكل واضح، يعنى رز ناقص ملح، شوربة ناقصها حاجات كتيرة مش معروفة، أكلها زايد فيها الملح، كلها شكليات بسيطة.

المهم هو إن الأكل يكون متحضر وجاهز وقت الفطار، وإنك عمرك ما ترجع البيت ومتلاقيش الأكل جاهز ومتحضر، وأهم من ده كله يبقى الأكل شكله حلو، آه ما هى العين بتاكل الأول.

أما بقى جودة الطعام والتفاصيل التانية دى ممكن نتكلم عليها بعد رمضان باستفاضة، لكن فى صعوبة شديدة فى ظبط توابل الأكل وقت الصيام. 

فا بلاش التعليقات السخيفة على الأكل وقت الفطار، وخصوصا بقى لو فى ناس معزومين أو أقارب، لأن ده بيكون محرج جدا لها.

هى حقيقى بتحاول تعمل أقصى حاجة. فا ياريت التعليقات اللطيفة والظريفة وقت الأكل ملهاش لازمة. 

وياريت بلاش تعليقات من الأساس، يعنى عندك كلمة حلوة قولها معندكش يبقى تأكل وأنت ساكت، وكل سنة وأنتم طيبين.