جوزك على ما تعوديه.. مواعيد دخول المطبخ فى رمضان

إن شاء الله احنا فى صيام وشهر عبادة وروحانية، فدخول المطبخ يكون بحساب  نظام السى بى سى سفرة ده مش موجود، نقعد نتفرج على التليفزيون وعلى برامج الأكل قبل الفطار ونطلب من الست تنزل تعمل الأكلات دى مرفوض تماما فى قواعد حملتهم بيها نظام التوين بوفيه مرفوض مش علشانا لا علشان صحتكم الشهر ده المفروض يكون فرصة نخس جميعا، آه نخس ونبطل أكل شوية وفرصة نرحم الست اللى بتقف طول اليوم فى المطبخ مالها الأكلات السهلة اللى بتاخد نص ساعة فى المطبخ، زعلتنا فى إيه؟ 

لازم محاشى وحاجات صعبة من اللى بنشوفها فى فيديوهات الانستجرام؟

أنا محتاجة أشرح لكم أن الفيديوهات دى بيقعدوا يعملوا الأكلً فيها بالساعات بس بيصوروها بسرعة، ده بقى مش معناها أنه بيطبخ بسرعة.

ممكن نتفق على جدول ثابت للأكل يعنى ممكن فى الويك إند يبقى فى أكلات صعبة أو بتاخد مجهود أكتر مع أنى شايفة إنها ملهاش لازمة، بس علشان تعرفوا إنكم غاليين علينا وبنحب نرضيكم. ولو تقدروا تخففوا طلبات كمان بعد الفطار من نوعية شاى وقهوة وحاجة حلوة والكلام الكبير ده يبقى تمام أوى الصراحة. ويا ريت كمان نخفف التعامل مع بعض قبل الفطار. 

خففوا علينا يخفف عليكم ربنا.. إحنا كمان بنصوم إن شاء الله معاكم.