جوزك على ما تعوديه.. الست الأصيلة رزق

 العلاقة بين الزوجة وأهل جوزها بيحكمها حاجات كتيرة، وبتكون علاقة شائكة جدا، نظرا لأن الأم بيكون عندها إحساس إن ابنها اتاخد منها وراح لحد غيرها، وده طبعا مش إحساس صح نهائى لكن للأسف بيحصل وبنشوفه.

ولكن اللى بيحكم الموضوع وبيحطه فى شكله المظبوط هى الزوجة، وبتقدر بحنكتها إنها تخلق علاقة سوية بينها وبين أهل زوجها، طبعا ده فى حالة إن أهل الزوج ناس طيبين وعقلانيين.

الفكرة إن المشاكل بتظهر بشكل كبير فى سنة أولى زواج، احترام الزوجة لأهله بيكون واضح من خلال تصرفات الزوج مع عائلته.

الزوجة بعد وقت بتكون هى الوسيط هى اللى بتنبه زوجها للمناسبات العائلية اللى ممكن جدا ينساها حتى لو لأهله نظرا لانشغاله.

وممكن تكون سبب فى حل بعض المشاكل العائلية البسيطة وده نتيجة لعلاقتها الطيبة مع باقى أفراد الأسرة. 

الزوجة تفكره أنه يبر والدته ويبر أخواته، أو كمان تاخد بالها من علاقته بأسرته مش لحاجة غير أنها زوجة أصيلة وفعلا بتراعى ربنا فى علاقتها بأهله.

اختصارًا يعنى لو ربنا كرمك بالست دى، اوعى تزعلها أو تنكد عليها  تاخد بالك منها وتعاملها معاملة الملوك لأنك مش حتلاقى زيها لأنها فعلاً بتحبك.