جوزك على ما تعوديه.. ممكن إجابات واضحة؟!
رغدة أبورجب
لما نسأل سؤال يا ريت تكون الإجابة محددة وواضحة، يعنى: ألبس ده ولا ده؟ نرد بوضوح ويا ريت تبرر اختيارك بأدلة، يعنى مثلا ده أحلى علشان.
تحب تأكل إيه على الغدا؟ تقول بوضوحً: بلاش بقى جو أى حاجة ولما نعمل الأى حاجة متعجبش، الموضوع سهل عاوز كذا تحب ننزل ولا نقعد فى البيت تقول وًبلاش جو ننزل طبعا وبعد شوية أصلى مش قادر أنزل والجو ده، عاوزين إجابات واضحة وًبلاش جو أى حاجة دى لأنكم فى الآخر مش بترضوا بالأى حاجة دى وبيكون دايما فى دماغكم معتقدات مختلفة.
ويا ريت لما نتناقش فى موضوع مهم ومصيرى تسيبوا الموبايل شوية وتركزوا معانا، لأن فى تفاصيل كتيرة ممكن تتوه منكم وأنتم على الموبايل، وطبعا الإجابة إنتى مقولتيش، والحقيقة إننا بنكون قولنا، وشرحنا ووضحنا بس أنت مش أنتً مع الموبايل فا حبة تركيز كده علشان الدنيا تمشي، وبلاش الكلمات اللى بتمشى فى كل المواقف دى: إن شاء الله، حشوف، ربنا يسهل، حسب ما نشوف، احتمال، معرفش، واللى غالبا بتتقال علشان نقفل الحوار من غير ما نعرف هو إحنا بنتكلم على إيه من الأساس خمس دقايق ركز فيهم وبعدين ارجع تانى لموبايلك وصمتك ودنيتك وأوعدك محدش حيضايقك تانى.
