جوزك على ما تعوديه.. يا ترى هى اللى مقصرة؟ ولا هو اللى عينه زايغة؟!
رغدة أبورجب
دايما بنلاقى فى حياتنا راجل مرتبط بيلطف مع ستات غير مرتبطات وبتبقى معادلة غير مفهومة لأنه فى حقيقة الأمر مرتبط فا الموضوع بيبقى غريب
لكن هما دايما (الرجال) مبرراتهم دايما حاضرة، فا يقعد يبرر أنه غير سعيد فى حياته لأنها مقصرة معاه وأنها فقدت الشغف والاهتمام وًكلام كبير أوى من هذا القبيل طبعا مبرراته غير مقنعة لطفل فى ابتدائى مش لواحدة أكيد شافت أمثاله كتير.
بس السؤال هو فى مبرر حتى لو هى مقصرة أنه يبحث عن الاهتمام والدلع بره؟ هل أنه مبقاش رقم واحد فى حياتها ده يديله الحق أنه يبحث عن ده برا؟
وهو مين هنا المخطئ؟ ومين المسئول عن وصول العلاقة للمرحلة دى؟
أنا بشوف أن الطرفين غلطانين وأنه مش من حقه يدور على ده بره إلا لو حاول معاها وبلغها أنه حيرتبط بشخص آخر، وساعتها يكون لها مطلق الحرية فى اتخاذ قرار الاستمرار من عدمه.
بس غير كده مفيش مبرر لراجل أنه يدور على الحب بره فى حالة أنه مرتبط، حتى ولو بيواجهه مشاكل.
والحقيقة أن فى عدد مش بسيط من الرجال بيحبوا أوى يلعبوا الدور ده اللى هو دور الضحية ويظهروا الحب والحنية برا وفى الحقيقه بتكون فراغة عين وحب ظهور واللعب بالمشاعر.
ونصيحة بلاش لعب الدور ده لأنها لو عرفت مش هتفكر مرتين فى الانتقام وساعتها لا تلوم إلا نفسك.
