قال إن عبدالفتاح مصطفى ساهم فى تطوير المحطة واهتم بالدعاية و«السوشيال ميديا» محمد نشــــأت: الراديو 9090 يكسب الجوائز لأن «هواه مصرى» والمواطن المصرى هو شغله الشاغل
إبراهيم محمود
النجاح معادلة مش سهلة، وتحتاج تضافر جهود عناصر كثيرة علشان الكيان ينجح ويكبر، واللى أصعب من النجاح هو الحفاظ عليه، وده بيحتاج جنب تضافر الجهود إدارة واعية ومُتمكنة وإخلاص وتطوير ومجهود أكبر من مجهود النجاح العادى بكثير. والراديو 9090 قدر يحقق كل ده بعد ما فاز بجائزة أفضل محطة إذاعية فى مصر لعام 2024 فى استفتاء مجلة «ديرجيست» فى نتيجة بقت مكررة خلال السنين اللى فاتت.
طب هل فى خلطة للنجاح ده وللحفاظ عليه؟ وهل وجود الإعلامى عبدالفتاح مصطفى كرئيس تنفيذى للراديو 9090 كان السبب وراه؟ وإيه الأسباب التانية اللى ورا النجاح ده، وورا تميز الراديو 9090؟ عشان نجاوب على الأسئلة دى وغيرها ونعرف أكثر تفاصيل منظومة الراديو 9090 التقت «روزاليوسف» بالإذاعى المتميز محمد نشأت اللى جاوب على كل الأسئلة دى وقربنا أكثر من عالم الراديو 9090 الساحر.
وإلى نص الحوار:
دخولك مجال الراديو جه إزاي؟ وإزاى اتحولت من ممثل لمذيع راديو؟
أنا كنت بعمل فيديوهات على الإنترنت أيام 2011 و2012، ودي كانت بداية ترشيحى للانضمام للراديو 9090، وكلمنى ساعتها الأستاذ طارق أبوالسعود والمهندس طارق إسماعيل ورشحونى للعمل فى الراديو 9090.
أما أنا فكنت ممثل وكنت خريج دفعة مسرحية «قهوة سادة» للأستاذ خالد جلال ومكنش عندى النية إنى أبقى مذيع راديو، ورحت قعدت معاهم وحسيت بتفاؤل شديد جدًا، وحبيت الموضوع خصوصًا إنى لما قعدت إتقال لى إننا عايزينك مذيع بالشكل اللى كنا بنشوفك بيه فى الفيديوهات بتاعتك على السوشيال ميديا وعايزينك بنفس الطريقة ونفس الأداء، وأنا كنت مستغرب الفكرة فى الأول لأن أنا فى الأصل ممثل، بس الحمد لله من أول ما بدأت حصل نجاح كبير جدًا وحبيت الراديو والإعلام لدرجة إنه بقى اهتمامى الأول وقبل التمثيل حتى.
مين صاحب فكرة برنامج «عشان الزحمة تعدى» وإزاي بدأ؟
«عشان الزحمة تعدى» الفكرة بتاعته كانت فكرة الأستاذ عبدالفتاح مصطفى وهو اللى طرحها وبعد كده اتناقشنا فيها وطورناها، هو قال إننا بنشتغل البرنامج فى فترة بعد الضهر، فممكن نشتغل كمجلة كده بتقول للناس الأخبار الخفيفة واللايت اللى دمها خفيف أكثر، وفى نفس الوقت بنقدم حاجات خدمية زى حالة الطقس والمرور وأخبار الرياضة، فاللى بيميزه هو إنه برنامج شامل بنتكلم فيه بطريقة لايت اللى الناس اتعودت إن إحنا بنتكلم بيها مش بطريقة ثقيلة، خصوصًا إن الناس بتبقى راجعة من الشغل فى الوقت ده وبتبقى عايزة تفك وتهزر، وفى نفس الوقت تعرف معلومات تفيدها بس بطريقة خفيفة.
إيه اللى إنت شايفه فى الراديو 9090 مختلف ومتميز فى الأجواء أو طريقة الشغل عشان كده خد جائزة أحسن محطة راديو؟
الحاجة المميزة فى الراديو 9090 اللى بتخليه يكسب الجوائز هو إن «هواه مصرى» زى الشعار بتاعه، بمعنى إن الراديو مصرى قوى بتاع الناس اللى فى الشارع قوي، وإنت بتسمعه هتلاقى أى حاجة فى أى مجال إنت عايز تسمعها هتلاقيها فى الراديو 9090، عشان كده الجمهور اللى بيسمع الراديو 9090 لازم هيلاقى برنامج ملمس معاه، سواء عايز برنامج لايت وهزار، أو عايز يسمع قصص الرعب والإثارة، أو برنامج صباحى خفيف، أو برامج سياسية عميقة بيقدمها أساتذة كبار، حتى الأغانى بيتم اختيارها بعناية شديدة وكل وقت فى اليوم ليه الأغانى بتاعته، والمواطن المصرى هو أهم حاجة الراديو 9090 معنى بيها والمواطن هو هدف الراديو الأولانى.
وجود عبدالفتاح مصطفى على رأس الراديو 9090 أضاف له إيه وإزاى ساعد فى نجاحه؟
الحقيقة عبدالفتاح مصطفى أضاف إضافة كبيرة للراديو 9090، هو فى الأصل أخونا وزميلنا وطالع من وسطينا فعارف كويس قوى كل مذيع بيحلم بإيه وطموحه إيه وممكن يطور نفسه إزاي، حافظ طريقة أداء المذيعين وحافظ نوعية البرامج اللى بيعملوها، وغير من طريقة المذيعين نفسهم وطورهم جدًا، اهتم جدًا بالسوشيال ميديا والدعاية للراديو، اهتم إن يكون فى نجوم كبار موجودين وسطينا فى الراديو 9090 طول الوقت، ورجّع الراديو 9090 بيلمع تانى كده، هو الراديو دايمًا مميز ودايمًا رقم واحد، بس هو أضاف ليه لمسة لمعان خاصة بيه.
إيه برنامج الراديو اللى كنت بتسمعه وإنت صغير وأثر عليك أو خلاك تحب الراديو؟
البرنامج اللى حببنى فى الراديو وأنا صغير هو برنامج «كلمتين وبس» للأستاذ الكبير العبقرى فؤاد المهندس و«أبلة فضيلة»، دى أكثر برامج أنا حبيتها وحببتنى فى الراديو طول الوقت.
بمناسبة الزحمة، إيه الحاجة اللى ممكن تعمل لمحمد نشأت زحمة فى دماغه، وإزاى بيعديها؟
الحاجة اللى بتعملى دوشة أو زحمة فى دماغى هى الفشل، أنا راجل بكره الفشل جدًا ومش موجود فى قاموسى ومش بحب الكلمة دي، ممكن متوفقتش فى حاجة فهجرب تانى وهفضل أسعى وأسعى ومليش علاقة بالنتيجة، فلما بلاقى حاجة بتفشل فده بيعملى زحمة كبيرة جدًا لحد ما أعرف هى وقفت ليه عشان ألاقى حل وتتحسن وترجع تانى رقم واحد وتنجح.
إيه أكثر موقف حلو حصلك فى الراديو؟ وإيه فى المقابل أكثر موقف صعب عدى عليك فيه؟
أكثر موقف حلو حصلى فى الراديو 9090 كان فى 2017 وكانت أول مرة أفوز فيها بجائزة أفضل مذيع فى جوائز «دير جيست» والجائزة دى كنت بشوف نجوم كبار بياخدوها فكانت شعور فخر شديد وتقدير للتعب اللى أنا تعبته ومكافأة كبيرة عليه، والحمد لله أنا كسبت الجائزة دى بعد كده 4 مرات.
أما أكثر موقف صعب حصلى فهو كان أيام فترة 30 يونيو، لأن الفترة دى كانت عصيبة جدًا أصلاً، وكنا عايزين نقف جنب بلدنا وكمان نقف فى وش بطش الإخوان، وبسبب بعض الظروف من حظر التجوال وغيره كنا بنضطر نقعد فى الراديو بالـ24 ساعة ورا بعض، ونمدد على الكنبة أو نفرش وننام على أرض الاستوديو، ورغم الصعوبات دى بس كنا فخورين جدًا بكل دقيقة بنقضيها على الهوا، ونقول ونوعى الناس عشان بلدنا تخلص من كابوس الإخوان المسلمين.
أخيرًا.. لو فى حاجة حابب تقولها قبل ما ننهى الحوار:
فى النهاية أنا حابب أشكر جمهور الراديو 9090، الناس دى لولاها إحنا كلنا ولا حاجة، والناس دى ليها حقوق وأفضال كبيرة جدًا علينا بعد ربنا سبحانه وتعالى، فأنا بشكرهم من كل قلبى على كل الدعم وكل الوقت اللى هما بياخدوه من وقتهم علشان يسمعونا ويخلونا إحنا موجودين وناجحين.
