عصمت فهمى وحسين عُمر

المهندس حسين عمر بيشتغل فى إحدى شركات الإنشاءات، متجوز وسعيد مع مراته الليّ كمان بتشتغل.

تنقلب حياتهم رأسًا على عقب لما مراته تتنقل من شغلها وتروح معاه وتشغل منصب المدير العام.

بمجرد دخول المديرة الجديدة للمكتب تحدث مفارقات كتيرة ومضحكة بسبب أن حسين ومراته مقالوش لحد أنهم متجوزين.

يتحول حسين من زوج محب بيشجع مراته فى الشغل لرجل شرقى تقليدى مخبى أن المدير العام هى المدام. حسين عمر وعصمت فهمى بيقدموا نموذج فى فيلم اتعمل سنة 1966 لموضوع مستحيل أيامها وأصبح واقعى الآن فى حياتنا.

الفيلم بشكل مباشر بيسلط الضوء حول حقوق المرأة ويجمع بين أبطاله شخصيات من المجتمع بنشوفهم فى حياتنا اليومية.

بعد صدمة حسين أن مراته هى المديرة بدأت أفكاره تتغير ليختزل دور الست فى أحد المشاهد قائلًا إن وظيفتها «الكنس والمسح والغسيل» بعد ما كان شايف عصمت ملكة متوجة فى الشغل والبيت.

فى الفيلم ده قدمت عصمت فهمى باقتدار نموذج للست الناجحة فى شغلها الليّ طّلعت من موظفيها أحسن ما فيهم. من أهم الشخصيات دى كان شفيق نورالدين وكيل المصلحة المتزمت جدًا الليّ عرفت عصمت تبدل أفكاره وتجعله أكثر لينًا وتفهمًا للاختلاف.

أما صلاح ذوالفقار فدة بقى فى حتة تانية من براعة لبس الشخصية بكل حذافيرها، نظراته وحواراته سواء مع عصمت أو زملاء العمل فيها بنشوف تبدل المشاعر والمواقف وتحوله من زوج محب لزوج متجوز مديرته.أداء مبهر يكاد يشعرنا أنه عايش معانا فى المجتمع دلوقتى وبيوصف تصرفات كل من هم فى موقفه.

أكتر من 58 سنة عدوا على الفيلم ده حصل فيهم تطور كبير فى المجتمع وتغيرت حال الست بشكل لا يقبل التشكيك وتولت فيه مناصب كبيرة وده يخلينا نقول إن الفيلم وشخصياته عمل عابر للأزمنة وكان مستنير جدًا فى وقته وسابق عصره أن جاز التعبير.

الفيلم بيطرح سؤال هو قصة العمل: هتعمل ايه لو صحيت فى يوم لقيت مراتك بقت مديرتك؟ كراجل مصرى أو شرقى لو المدام بقت الريسة ولازم تقول لها حاضر ونعم وتاخد بالك من شغلك لأنك محل تقييم ولازم تفصل بين البيت والشغل وتبقى أنت مدير البيت ورب الأسرة بس مع صباح كل يوم تسلم الراية للمدام المديرة هتعمل إيه؟؟ القصة المأخوذة عن قصة للأديب عبدالحميد جودة السحار وسعد الدين وهبة وإخراج فطين عبدالوهاب كانت فى منتهى الروعة وعملوا مع بعض توليفة فى شكل فيلم لانزال نحبه مهما شفناه وبنفضل نشوفه متكرر فى الحياة. فيلم مراتى مدير عام تم اختياره فى قائمة أفضل مائة فيلم فى تاريخ السينما المصرية وهو بلا شك من خلال أبطاله عصمت فهمى وحسين عُمر جسدوا فكرة كنا نعتقدها مستحيلة ولكنها مع الزمن أصبحت واقعية.