جوزك على ما تعوديه.. تحت شعار أنا زعلانة

فى أوقات كتيرة جدًا بيبقى حقيقى مفيش قدامنا غير البوز كحل ممكن نلجأ له فى حالات الزعل، بيكون هو الملجأ الوحيد.

أصل فى القفشات العادية بتاعة كل يوم معنديش حلول ممكن أعملها كنوع من أنواع التعبير عن الغضب غير البوز.

أكيد مش حعرف أعمل بلوك فى التليفون ولا على السوشيال ميديا لأن ببساطة هو نايم جانبى على السرير،  ولا حعرف أعمل له كول تون مخصماك لأنى قدامه طول اليوم وغالبا هو مش بيكلمنى أساسا على التليفون أنا غالبًا اللى دايما بكلمه.

وأكيد مش حاخد العيال وأروح عند أهلى لأن دى حتكون أحلى فترة فى حياته ومش بعيد يسيبنى زعلانة علشان يفضل فى البيت لوحده.

وطبعا مش حعرف أشيل صورنا من على الفيس بوك أو أشيل صوره من على موبايلى لأنى ببساطة مش حعرف أرجعها تانى بسهولة.

فا مش بيكون قدامنا كزوجات غير البوز لأنه أسهل وأسرع حاجة نعبر بيها عن زعلنا.

أنا عارفة إنه بيزود المشاكل وممكن يؤدى إلى مشاكل أكبر.

أحب أقول لك جربى اتكلمى فى اللى مضايقك، طبعا انتى ممكن تسيبى المقالة ومتكمليهاش ومعاكى حق لأنى عارفة إنك حاولتى مليون مرة وإن مفيش فايدة وهو لو كان مهتم كان عمل وكل الحاجات الطريفة دى. 

بس الحقيقة إنك لازم تحاولى علشانك مش علشان حد تانى فايمكن لما تختارى الوقت المظبوط والطريقة المناسبة يفهم سبب زعلك واحتمال ضعيف إنه يبطل يعمله، بس أهو يبقى اسمك جربتى،  ولا يأس مع الحياة.