جوزك على ما تعوديه.. Happy Valentine
رغدة أبورجب
عيد الحب خلص الأسبوع اللى فات.. وطبعًا أغلب الرجالة نسيوه مع إن البلد كلها بيبقى لونها أحمر، ده حتى الباعة الجائلين بيبيعوا بلالين وقلوب حمرا.
واللى حيقول إيه الفلانتين اللى عاوزين تحتفلوا بيه وكرتونة البيت وصلت 201 جنيه.. وكلام جميل أوى عارفة إنى حاسمعه علشان بقول لكم على الفلانتين.
طبعًا الستات حاليًا قاعدة زعلانة إن جوزها معبرهاش بأى حاجة يوم الفلانتين.
أحب أقول لحضرتك أنك ارتفعتى بسقف طموحاتك لحد ما وقع عليكِ.
إحنا اتعلمنا فى المعاملات مع الرجالة لازم فيها تنزلى بسقف الطموحات لحد ما يتساوى بالأرض.
وبالرغم من أنه يوم ومش طالبين فيه معجزات، ممكن كلمة حلوة أو وردة يضبطوا الدنيا، ويا سلام مع الكلمة الحلوة وش جميل وبيضحك من غير بوز، والله بقى لو كمان من غير طلبات اليوم ده يبقى كده تمام أوي، إلا أن أغلبهم مبيعملش كده ويا سلام لو تفضلت وتكرمت وعزمتها على العشا بليل يبقى أنت كده ضمنت راحة وسعادة شبه أبدية ومش مهم لو ده محلصلش فى عيد الحب ممكن أى يوم، الستات بترضى بأى حاجة مش حتقول لأ.
يعنى باختصار لو ملحقتش يوم الفلانتين مش مهم خرجها أى يوم أو حتى كلمتين حلوين أى يوم بردو المهم الست تسمع أو تشوف أى أمارة.
ولو كان لطيف معاكى بس مجبش هدية احمدى ربنا أنه لطيف من الأساس ومش مبوز فى وشك. أرجوكم يا بنات بلاش تطلعوا بسقف التوقعات علشان ميتهدش على رأسكم.
